Attestattaý: Іshki ister organynyń 10 myń 700 qyzmetkeri qyzmetine laıyqty emes dep tanyldy
ASTANA. 19 qarasha. QazAqparat - Іshki ister mınıstriginiń jeke quramynda bıylǵy elimizdegi kezekten tys attestattaý jumystary aıaqtaldy.
73 myńnan astam qyzmetker attestattaýdan ótti. Búgin Parlament Májilisinde ótken Úkimet saǵatynda baıandama jasaǵan Іshki ister mınıstri Qalmuhanbet Qasymov osylaı aıtty.
«Onyń ishinde 2 myńǵa tarta ishki ister qyzmetkeri attestattaýdan bas tartyp, ishki ister organynan jumystan shyǵyp ketti. Al sharanyń nátıjesinde 10 myń 700 adam ózderiniń atqaratyn qyzmetine laıyqty emes dep tanyldy. Onyń ishinde 3 myń 900-i jumystan shyǵarylsa, 2 myń 700 qyzmetkerdiń laýazymy tómendetildi», - dedi Qalmuhanbet Qasymov.
Sonymen qatar, vedomstvo basshysy kadrlarmen jumysta kóptegen kemshilikter men olqylyqtar oryn alǵanyn da atap ótti. «Bul bizdiń tarapymyzdan sheshilýge tıisti eń qıyn mindettiń biri shyǵar. Áli de kadrlardyń jumystan ketýi báseńdegen joq. Máselen, bıyl ishki ister organdaryna 5 myń 800 adam qyzmetke alynsa, esesine 9 myń 400 adam jumystan shyqty», - dedi ol.
