Attestatsııadan ótpegen muǵalimderge taǵy bir múmkindik beriledi
ASTANA. QazAqparat - Jańa oqý jylynan bastap attestatsııany tapsyrǵan muǵalimderge ústemaqy tólene bastaıdy, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń sózine qaraǵanda, attestatsııanyń bıylǵy júıesi boıynsha árbir muǵalimge biliktilik sanaty beriledi. Soǵan qaraı jalaqyǵa 30-50 protsent kóleminde ústemaqy qosylady.
«Mamyr aıynda attestatsııaǵa 60 myńǵa jýyq muǵalimder qatysyp, olardyń ishinen 36 myńnan astamy attestatsııadan ótti. Bul - barlyq muǵalimderdiń 63 protsenti. Osy jyldyń qyrkúıek aıynan bastap attestatsııadan ótken muǵalimderge kategorııalaryna qaraı qosymsha aqy tólenedi. Al attestattaýdan ótpegen muǵalimder ony aǵymdaǵy jylǵy qarashada qaıta tapsyra alady», - dedi E.Saǵadıev Tamyz konferentsııasynyń plenarlyq májilisinde.
Aıta keteıik, attestatsııadan bólek jańartylǵan bilim berý mazmuny úshin tólenetin 30 protsenttik ústemaqy da bar. Mınıstrliktiń málimetine sáıkes, osy sanatqa respýblıka boıynsha 205 myń muǵalim kiredi. «Ústemaqynyń tek qana 18 saǵatqa tólenetinin biz bilemiz. Qazir osy máseleni sheship jatyrmyz», - deıdi E.Saǵadıev.
Aldaǵy ýaqytta mınıstrlik mektep muǵalimderin UBT-dan bosatýdy josparlap otyr. Budan bólek, bıyl muǵalimderdiń júktemesine qatysty arnaıy buıryq shyqty. Oǵan sáıkes, mektep muǵalimi tek 5 qujatty ǵana toltyrýǵa mindetti. Budan bólek, mektep pen ata-analar arasynda kelisimsharttar rásimdeledi. Atalǵan bastama alǵash ret bıylǵy oqý jylynan bastap engizilip otyr.
