Attestatsııadan ótetin memqyzmetshimen áńgimelesý barysy aýdıo jáne beıne taspaǵa jazylady
ASTANA. QazAqparat - Attestatsııadan ótetin memlekettik qyzmetshimen áńgimelesý barysy aýdıo jáne beıne taspaǵa jazylady. Bul jaıynda Qaraǵandydaǵa kezdesý barysynda Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaımova aıtty, dep habarlaıdy QazAqparat.
«Aǵat pikir bildirý ádepti buzý sanalady. Soǵan oraı Ádep kodeksine sáıkes jaýapkershilik jaıynda sóz bolýy qajet. ıAǵnı, attestatsııalyq komıssııanyń árbir múshesi ózderine attestatsııany pozıtıvti ári ashyq ótkizý barysynda jaýapkershilik júkteletindigin túsinýi tıis. Munan bólek, ashyqtyqtyq pen tıimdilikti qamtamasyz etý úshin attestatsııalyq komıssııa quramyna qoǵam jáne BAQ ókilderi kiretin bolady», - dedi ol.
Onyń aıtýynsha, attestatsııadan ótetin memlekettik qyzmetshimen áńgimelesý barysy mindetti túrde aýdıo jáne beıne taspaǵa jazylady. Bul attestatsııadan ótýshini de, attestatsııalyq komıssııa múshesin de negizsiz shaǵymdardan qorǵaıtyn bolady. Áńgimelesý 5-7 mınýt ýaqytty alady.
«Testileý baǵdarlamasyn halyqaralyq konsaltıngtik agenttiktiń mamandary ázirledi. Suraqtar tizimi boıynsha belgili bir normatıvtik aktiler joq. Bul ókiletti organnan nusqaýlyq hat bolady», - dedi Shaımova.
Aıta keteıik, buǵan deıin habarlaǵanymyzdaı, Aıgúl Shaımova Qaraǵandy oblysy ákimdiginde «B» korpýsyndaǵy memlekettik qyzmetshilerdiń aldaǵy attestatsııasy boıynsha kezdesý ótkizdi.
Qaraǵandy oblysynda 2 aqpan kúni orta toptaǵy memqyzmetshilerdi testileý bastalady. Kezdesýde atalyp ótilgendeı, óńirde 5000-nan astam memqyzmetshi attestatsııadan ótedi. Kórsetilgen sanattar boıynsha, 1157 adam (memlekettik qyzmet apparatynyń jalpy 23,6%-y) testileýden bosatylady.
