Attestatsııadan óte almaǵan ishki ister organy qyzmetkerlerine qaıta tapsyrý múmkindigi qarastyrylýy kerek - ІІM

Bul týraly búgin Májilistiń Zańnama jáne sot-quqyqtyq reforma komıtetiniń keńeıtilgen otyrysynda Іshki ister mınıstriniń orynbasary Erlik Kenenbaev málim etti. Esterińizge sala keteıik, komıtet otyrysynda «Qazaqstan Respýblıkasynyń keıbir zańnamalyq aktilerine ártúrli zańnamalyq aktilerdiń quqyq normalary arasyndaǵy qaıshylyqtardy, olqylyqtardy, kollızııalardy jáne sybaılas jemqorlyq quqyq buzýshylyqtar jasaýǵa yqpal etetin normalardy joıý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymǵa ázirleý barysynda   talqylanǵan bolatyn.

Talqylaý barysynda ІІM orynbasary Erlik Kenenbaev ishki ister organdarynyń qyzmetkerleri barlyǵy birdeı kezekten tys attestatsııadan óte almaýy múmkin ekendigin aıtqan bolatyn. «Bunyń ishinde de negizinen aýqymy tar mamandyqtar, krımınalıster,  daktıloskopıster,  kınologtar bar. Olardyń barlyǵy birdeı testileýden birinshi kezeńde-aq óte almaýy múmkin, al qaıta tapsyrý qarastyrylmaǵan. Negizi bul mamandyqtarǵa oqytý úshin memleket te az shyǵyndanǵan joq», - dedi E. Kenenbaev.  Onyń aıtýynsha, kezekten tys attestatsııadan ótkizýge qatysty atalǵan norma qarastyrylǵan zań jobasynda engizilmese, bunyń ózi qyzmetkerlerdi kemsitýshilikke ushyratady. «Qoldanystaǵy zańnamada attestatsııany qaıta tapsyrý kórinis tapqan. Bul norma jańa zań jobasynda da qamtylýy kerek», - deıdi mınıstrdiń orynbasary.