Attestatsııa-2018: Muǵalimderdiń burynǵy ústemeaqylary saqtala ma
ASTANA. QazAqparat - Bıyl qyrkúıek aıynda mektep muǵalimderi attestatsııadan ótedi, dep xabarlaıdy QazAqparat tilshisi.
QR Bilim jáne ǵylym vıtse-mınıstri Asxat Aımaǵambetovtiń aıtýynsha, osy ýaqytqa deıin úsh kategorııa boıynsha tólengen ústemeaqylardyń barlyǵy saqtalady.
"Buǵan deıin joǵary, birinshi jáne ekinshi kategorııalar boldy. Attestatsııanyń jańa júıesine sáıkes, atalǵan kategorııalar boıynsha qazirgi barlyq ústemeaqylar saqtalady. Sonyń ústine qosymsha ústemaqy alamyn dese, jańa júıe boıynsha ulttyq biliktilik testin tapsyrady. Odan keıin ekinshi kezeń bar. Ony da oıdaǵydaı tapsyrsa, biliktilik deńgeıine qaraı 30-50 protsentke deıin ústemeaqy alýǵa bolady", - dedi A.Aımaǵambetov QazAqparat tilshisine bergen suxbatynda.
Vıtse-mınıstrdiń sózine qaraǵanda, jaqyn arada attestatsııanyń jańa erejesi bekitiledi. Sonyń negizinde muǵalimderdiń biliktiligi tekseriletin bolady.
Aıta keteıik, Úkimettiń búgingi otyrysynda QR Bilim jáne ǵylym mınıstri Erlan Saǵadıev qyrkúıekte muǵalimderdiń attestatsııadan ótetinin málimdedi. Onyń aıtýynsha, búginde respýblıka boıynsha 285 myńnan astam muǵalim jumys isteıdi. Olardyń teń jartysy - joǵary jáne birinshi sanattaǵy muǵalimder.
