Atsálim Idıgov: Halyqtyń rýhanııaty - jemisti aǵashqa nár beretin káýsár bulaq
TALDYQORǴAN. QazAqparat - Elbasy Nursultan Nazarbaev elimizdiń ekonomıkasyn, áleýmettik saladaǵy keleli máselelerdi oılaı júrip, halyqtyń rýhanı damýyn da esten shyǵarǵan emes. Al rýhanııat jemis beretin aǵashtyń tamyryna nár beretin káýsár bulaq ispetti. Bul Almaty oblystyq «Ognı Alataý» gazetiniń bas redaktory, Qazaqstan halqy Assambleıasynyń múshesi Atsálim Idıgovtyń paıymy, dep habarlaıdy Qazaqparat tilshisi.
«Rýhanı nársiz kez kelgen etnos máńgilik el bola almaıdy. Oǵan qazaq halqynyń kópǵasyrlyq tarıhy dálel. Uzaq ýaqyt boıy babalar rýhy jaýjúrek kóshpendi halyqtyń túrli qıyn-qyspaqtan aman shyǵýyna sebepshi boldy. Mysalǵa Jońǵar shapqynshylyǵyn keltirýge bolady», deıdi Atsálim Idıgov.
Jetisýlyq beldi jýrnalıst Prezıdenttiń osydan birneshe jyl burynǵy Ulytaý eteginde aıtqan oı-tolǵamdaryn eske alyp, Nursultan Nazarbaevtyń rýhanııat, Islam dini, patrıotızm, halyqtyń búgini men erteńi týraly taǵylymdy suhbatyna tánti bolǵanyn jasyrmaıdy.
Endi mine, sol jerde aıtylǵan sóz júzege asyryla bastady. Elbasynyń «Bolashaqqa baǵdar: rýhanı jańǵyrý» atty maqalasy sonyń aıǵaǵy. Maqalanyń ár bólimi bir tóbe. Biraq Atsálim Idıgovty rýhanııattyń ajyramas bóligi - til máselesi erekshe tebirentken.
"Til - halyq janynyń aınasy, oıynyń oramy, rýhanı qundylyqtarynyń sandyǵy, etnıkalyq biregeıliginiń kórsetkishi. Al 130-dan astam etnosy bar polıetnıkalyq Qazaqstan qoǵamy úshin tildiń alar orny óte bıik. Biz bárimiz Qazaqstan azamaty bolǵandyqtan qazaq tilin bilý paryz. Bul Ata zańymyzda da aıtylǵan", - deıdi ol.
Jetisý jerindegi sheshen ultynyń jigitbasy Atsálim Idıgov top aldynda qazaq tilinde qaımyqpaı sóıleıtinin maqtan tutady.
