Atom salasynda jańa mamandyqtar ashylady

ASTANA. KAZINFORM — Elimizdegi JOO-da atom salasyna qatysty jańa mamandyqtar ashylady. Bul týraly Atom energııasy jónindegi agenttik ókili Kazinform tilshisine bergen suhbatynda málimdedi.

– Atom elektr stantsııasynda jumys isteıtin mamandar bólek daıyndalady. Onyń qurylysyna qatysatyn jáne qurylysy aıaqtalǵan soń stantsııada jumys isteıtin adamdardy qazirden bastap daıyndap jatyrmyz. Bas merdigerimiz – Halyqaralyq atom energııasy jónindegi agenttiktiń birqatar talaptary bar. Sol boıynsha eń aldymen JOO-da jańa mamandyqtar ashamyz. Solaı aldaǵy ýaqytta salynatyn AES-te qyzmet etetin mamandardy daıyndaımyz. Sonyń arqasynda qurylys aıaqtalǵan soń onda tolyǵymen qazaqstandyq mamandar jumys isteıdi degen úmitimiz bar, - deıdi Qazaqstandyq qamtý departamentiniń dırektory Danııar Janseıitov.

Agenttik mamandardy jańa model boıynsha daıyndamaq.

– Qazaqstandaǵy zertteý ınstıtýttaryna mashyqtaný modelderin qoıýdy josparlap otyrmyz. Sol jumystar júzege assa, qazaqstandyq mamandar elimizden shyqpaı-aq bastan-aıaq daıyndala alady. Biraq bas merdigerdiń de talaptaryn umytpaýymyz kerek. Aldaǵy ýaqytta ortaq mámilege kelgennen keıin kadrlardy daıyndaýǵa qatysty tıimdi sheshim shyǵaramyz degen úmittemiz, - deıdi agenttik ókili.

Aıta keteıik, buǵan deıin atom energetıkasy salasyna kadr daıyndaý máselesi sheteldik JOO-men birlese sheshiletini habarlanǵan bolatyn.