Atom salasy jalaqysy eń joǵary mamandyqtardyń birine aınalady

ASTANA. KAZINFORM — Qazaqstan aldaǵy ýaqytta 3 birdeı atom elektr stantsııasyn salýdy josparlap otyr. 

Jaýaptylar atom salasyn jalaqysy joǵary mamandyqqa aınaldyrýdy josparlap otyrǵandaryn aıtady. Bul týraly Atom energııasy jónindegi agenttiktiń mamany habarlady.

— Bul Qazaqstanǵa jańa kelgen sala emes. Bul baǵytta 60 jyldan asa tájirıbemiz bar. Atom salasynda qyzmet etetin 20 myńǵa jýyq mamannyń arasynda tehnıkalyq ta, basqarý personaldary da bar. Al bul salada jalaqy mólsheri úlken dıapazonda. Tipti ortasha eseppen alsaq ta elimizdegi ortasha jalaqydan kóp. Memleket basshysynyń tapsyrmasymen elimizde 3 AES salynbaq. Oǵan qazaqstandyq mamandar qajet bolady. Ol mamandardy da ózimiz daıyndaımyz. Jáne bul salany elimizdegi jalaqysy joǵary salalardyń birine aınaldyrýdy josparlap otyrmyz, — deıdi Qazaqstandyq damý departamentiniń basshysy Danııar Janseıitov.

Aıta keteıik, buǵan deıin Kazinform tilshisi atom salasynyń mamanymen tildesip, jumysymen tanysqan edi.