Atom salasy úshin mamandar daıarlaýǵa baǵyttalǵan Salalyq keńes quryldy
ASTANA. KAZINFORM – Qazaqstanda atom salasyndaǵy kásiptik biliktilikter jónindegi Salalyq keńes quryldy, dep habarlaıdy Atom energııasy jónindegi agenttik.
Jańa saraptamalyq alań memlekettik organdardyń, «Atameken» ulttyq kásipkerler palatasynyń, Kásiptik biliktilikter jónindegi ulttyq organnyń, salalyq jumys berýshi uıymdardyń, sondaı-aq atom salasyna kadr daıarlaıtyn joǵary oqý oryndarynyń ókilderin biriktirdi.
– Salalyq keńestiń negizgi maqsaty – atom salasyndaǵy kásiptik biliktilikterdi damytý jónindegi jumysty úılestirý. Keńes salalyq biliktilik sheńberlerin qarap, bekitedi, kásiptik standarttardy jáne kásipter tizilimin ózektendirý jónindegi usynystardy kelisedi, sondaı-aq kásiptik biliktilikterdi taný tásilderin aıqyndaıdy, – delingen habarlamada.
Mamandardyń aıtýynsha, Salalyq keńestiń qurylýy atom salasy úshin kadrlar daıarlaýdyń zamanaýı júıesin qalyptastyrý jolyndaǵy mańyzdy qadam sanalady.
Keńes jumysy memleket, bilim berý uıymdary men jumys berýshiler arasyndaǵy baılanysty nyǵaıtýǵa, bilim berý baǵdarlamalaryn salanyń qazirgi qajettilikterine sáıkestendirýge jáne mamandar daıarlaý sapasyn arttyrýǵa baǵyttalǵan.
Sonymen qatar bul bastama Qazaqstannyń atom salasyn turaqty damytýǵa qajetti kadrlyq áleýet qalyptastyrýǵa yqpal etedi.
Aıta keteıik, Qazaqstan–Qytaı kelissózinde atom energetıkasy boıynsha jańa baǵyttar aıqyndaldy.
