Atom energııasyn paıdalanýǵa baǵyttalǵan zań jobasy Senattyń jalpy otyrysyna shyǵarylady
ASTANA. QazAqparat - Búgin Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysy ótti. Onda komıtet músheleri «Atom energııasyn paıdalaný týraly» zań jobasyn talqylady.
Atalǵan zań jobasy ıadrolyq, radıatsııalyq jáne elektrofızıkalyq qondyrǵylardy ornalastyrý, salý, paıdalaný jáne paıdalanýdan shyǵarý kezinde qaýipsizdiktiń qaǵıdattary men negizgi talaptaryn belgileýge baǵyttalǵan. Budan bólek, qujatty qabyldaý atom energııasyn paıdalaný kezinde qaýipsizdikti qamtý jáne ony retteýdegi atom energııasyn paıdalanatyn mekemelerge qaýipsizdik deńgeıiniń talaptaryn oryndaýǵa, olardy júzege asyrýǵa ketetin shyǵyndardy azaıtýǵa múmkindik beredi. Budan bólek, zań jobasy qorshaǵan ortany qorǵaýdy kózdeıdi, ıaǵnı, memlekettik organdar men uıymdardyń jaýapkershilik ýákilettiligin naqtylaý arqyly qorshaǵan ortany qorǵaýdyń tıimdi joldary qamtylady. Aıta keterligi, búgingi tańda elimizde medıtsınada, ónerkásip pen ǵylymda qoldanylatyn 5 ıadrolyq qondyrǵy, 4 radıoaktıvtik qaldyqtar qoımalary, júzdegen radıatsııalyq qondyrǵylar, birneshe myń sáýleler ıondaıtyn nysandar bar. Sonymen qatar, Qazaqstanda atom energııasyn paıdalaný jumystaryn júrgizýge 3 myńnan astam lıtsenzııalar berilgen. Atom energııasyn paıdalaný salasynda qyzmetterin júzege asyratyn uıymdar men kásipkerlik sýbektiler sany da artyp keledi. Talqylaýdan soń komıtet zań jobasyn palatanyń jalpy otyrysyna shyǵarý týraly ýaǵdalasty.
