Atom energııasyn paıdalaný týraly zań jobasy halyqaralyq talaptarǵa úılestirilgen - D. Turǵanov
ASTANA. Sáýirdiń 13-i. QazAqparat /Qanat Mámetqazyuly/ - Atom energııasyn paıdalaný týraly jańa zań jobasy halyqaralyq talaptarǵa úılestirilgen.
Búgin QR Parlamenti Májilisinde atalǵan qujattyń tanystyrylymy barysynda Indýstrııa jáne jańa tehnologııalar vıtse-mınıstri Dúısenbaı Turǵanov osylaı málim etti, dep habarlaıdy QazAqparat.
«Zań jobasy boıynsha Úkimettiń, ýákiletti organnyń atom energııasyn paıdalaný salasyndaǵy quziretterin belgileý jáne olardyń arajigin ajyratý sharalary qarastyrylyp otyr. Sonymen birge, qujatta atom energııasyn paıdalaný salasyndaǵy memlekettik baqylaý men qadaǵalaýdy júzege asyrý qamtylǵan. Bul rette ıadrolyq, radıatsııalyq jáne elektrofızıkalyq qondyrǵylardyń radıatsııalyq qaýiptiligi sanattaryn anyqtaý, ıadrolyq materıaldar men ıondaýshy sáýlelený kózderin esepke alý sharalary kózdelip otyr. Sonymen birge, zań jobasynda ıadrolyq jáne radıatsııalyq qaýipsizdikke saraptama júrgizý tártibi, qaýipsizdik salasyndaǵy qajetti ǵylymı jáne tehnıkalyq zertteýlerdi anyqtaý jumystary qarastyrylady. Bul qaýipsizdiktiń joǵary standarttaryn qoldaý úshin mańyzdy», dedi vıtse-mınıstr.
Onyń aıtýynsha, zań jobasy ıadrolyq qyzmettiń qaýipsizdigi jónindegi halyqaralyq talaptarmen úılestirilgen.
«Qujatty qabyldaý qosymsha qarjy shyǵyndaryna, sondaı-aq Qazaqstan Respýblıkasy úshin, onyń ishinde ınvestıtsııalyq ahýal bóliginde keleńsiz áleýmettik-ekonomıkalyq zardaptarǵa ákep soqtyrmaıdy», dedi D. Turǵanov.
