Atom energııasy jónindegi halyqaralyq agenttiktiń bas dırektory Qazaqstanǵa keledi

ASTANA. QazAqparat – 18 sáýirde Atom energııasy jónindegi halyqaralyq agenttiktiń bas dırektory Rafael Marıano Grossı Qazaqstanǵa keledi. Bul týraly BAQ ókilderimen ótken brıfıngide SІM resmı ókili Aıbek Smadııarov aıtty, dep habarlaıdy QazAqparat tilshisi.

«18 sáýirde Atom energııasy jónindegi halyqaralyq agenttiktiń bas dırektory Rafael Marıano Grossı jumys saparymen Qazaqstanǵa keledi. Sapar barysynda Memleket basshysymen, QR Syrtqy ister, Energetıka jáne Densaýlyq saqtaý mınıstrlerimen kezdesedi, sondaı-aq Óskemendegi Úlbi metallýrgııa zaýytynyń aýmaǵynda ornalasqan agenttiktiń az baıytylǵan ýran bankine barady», - dep málim etti vedomstvonyń resmı ókili Aıbek Smadııarov.

Ol sonymen birge qazaqstandyq delegatsııa 18-19 sáýir aralyǵynda Jenevada ótetin BUU-nyń Eýropalyq ekonomıka komıssııasynyń 70-shi sessııasyna qatysatynyn aıtty.

Jıynnyń taqyryby – Eýropalyq ekonomıkalyq komıssııa óńirindegi ornyqty damý múddesi úshin tsıfrlyq jáne jasyl transformatsııa.