Atom energııasy jónindegi agenttik pen «Rosatom» AES salý jónindegi jol kartasyn bekitti
ASTANA. KAZINFORM – Sankt-Peterbor halyqaralyq ekonomıkalyq forýmy aıasynda QR Atom energııasy agenttiginiń tóraǵasy Almasadam Sátqalıev pen «Rosatom» memlekettik korporatsııasynyń bas dırektory Alekseı Lıhachev Qazaqstanda atom elektr stantsııasyn salý jobasyn iske asyrý máseleleri boıynsha kezdesý ótkizdi.
Aldymen jobany daıyndaý jáne iske asyrý kezeńderin qamtıtyn ındıkatıvtik jol kartasy bekitildi. Qujatta ınjenerlik-izdestirý jumystaryn júrgizý, EPC-shart jasasý jáne jobalyq qujattamany ázirleý kózdelgen.
Sondaı-aq «Qazaqstandyq atom elektr stantsııalary» JShS («QAES») men «Rosatom» memlekettik korporatsııasynyń ınjınırıngtik kompanııasy – «Atomstroıeksport» AQ arasynda Almaty oblysynyń Jambyl aýdanynda jobany iske asyrýǵa baılanysty yntymaqtastyqtyń negizgi qaǵıdattaryn aıqyndaıtyn negizdemelik kelisimge qol qoıyldy.
Atalǵan strategııalyq joba beıbit maqsattaǵy atom energııasyn paıdalaný salasyndaǵy memleketaralyq yntymaqtastyq aıasynda júzege asyrylady jáne Qazaqstannyń energetıkalyq qaýipsizdigin qamtamasyz etý men el ekonomıkasyn dekarbonızatsııalaý jónindegi strategııalyq mindetterge qol jetkizýge baǵyttalǵan. Taraptar bul jobanyń elimiz úshin strategııalyq mańyzdylyǵyn jáne ony jedel iske asyrý qajettigin atap ótti.
– Qazaqstanda atom elektr stantsııasyn salatyn halyqaralyq konsortsıýmdy basqarý quqyǵyn senip tapsyrǵany úshin Qazaqstan tarapyna alǵysymyzdy bildiremiz. Qazaqstan – atom salasyndaǵy bizdiń senimdi tarıhı seriktesimiz. Senimdiligi, qaýipsizdigi jáne tıimdiligi dáleldengen reseılik ıadrolyq tehnologııalar Qazaqstan halqynyń ıgiligine qyzmet etip, eldiń energetıkalyq egemendigin nyǵaıtady dep senemiz, - dedi «Rosatom» memlekettik korporatsııasynyń bas dırektory Alekseı Lıhachev.
Óz kezeginde QR Atom energııasy jónindegi agenttiginiń tóraǵasy Almasadam Sátqalıev Qazaqstanda atom stantsııasyn salý elimizdiń energetıkasyn ornyqty damytýdy qamtamasyz etýge baǵyttalǵan keshendi strategııanyń biri ekenin aıtty. Ol sondaı-aq qaýipsizdiktiń joǵary deńgeıin jáne óndiristi jergiliktendirýdi qamtamasyz etý úshin seriktestermen tyǵyz ári ashyq yntymaqtastyqqa senim artatynyn jetkizdi.