Atom energııasy jónindegi agenttiginiń ǵylymı-tehnıkalyq keńesi jumysyn bastady
ASTANA. KAZINFORM — Qazaqstan Respýblıkasynyń Atom energııasy jónindegi agenttiginde ǵylymı-tehnıkalyq keńestiń (ǴTK) birinshi otyrysy ótti, dep habarlaıdy vedomstvonyń baspasóz qyzmeti.
Ol atom ǵylymy men tehnologııalaryn damytý salasynda turaqty jumys isteıtin saraptamalyq organ retinde jumysyn bastady. ǴTK bekitilgen erejege sáıkes quryldy jáne Agenttik qyzmetine kásibı saraptamalyq qoldaý kórsetýge arnalǵan.
Keńestiń negizgi mindetteri — atom salasyn ǵylymı-tehnıkalyq damytýdyń basym baǵyttary boıynsha usynymdar ázirleý, ǵylymı jáne tehnologııalyq baǵdarlamalardy qaraý, sondaı-aq ǵylymı kún tártibin qalyptastyrýǵa qatysý.
— Birinshi otyrys barysynda atom ǵylymyn damytýdyń uzaq merzimdi ǵylymı-tehnıkalyq baǵdarlamasyn qalyptastyrý tásilderi, ǵylymı jobalardy saraptamalyq súıemeldeý máseleleri jáne jer qoınaýyn paıdalanýshylardyń qarajaty esebinen ýran óndirýge jumsalatyn shyǵyndardyń bir paıyzy mólsherinde iske asyrylatyn jobalardy qosa alǵanda, ǵylymı-zertteý jáne tájirıbelik-konstrýktorlyq jumystardy qarjylandyrý tetikteri qaraldy. Qarajatty utymdy paıdalaný qajettiligine jáne olardyń sala men ekonomıka úshin praktıkalyq mańyzy bar qoldanbaly mindetterge baǵyttalýyna erekshe nazar aýdaryldy, — delingen habarlamada.
Ǵylymı-tehnıkalyq keńestiń quramyna jetekshi ǵalymdar men sarapshylar, memlekettik organdardyń, ulttyq kompanııalardyń, damý ınstıtýttary men beıindi uıymdar men ýnıversıtetterdiń ókilderi kirdi.
Keńes músheleriniń jartysynan kóbi ǵylymı dárejelerge ıe, bul atom salasyn damytýdyń negizgi máselelerin qaraý kezinde ǵylymı negizdilik pen kásibı saraptamanyń joǵary deńgeıin qamtamasyz etedi.
Aıta keteıik, ǵylymı-tehnıkalyq keńestiń jumysyn uıymdastyrýdy jáne úılestirýdi Qazaqstan Respýblıkasy Atom energııasy Agenttiginiń ǵylym jáne ınnovatsııalar departamenti júzege asyrady.
Budan buryn Atom energııasy jónindegi agenttik pen «Rosatom» AES salý jónindegi jol kartasyn bekitkenin jazdy.