Atom energetıkasyn damytý úshin Qazaqstanǵa ulttyq baǵdarlama qajet - ǵalym Jasulan Shaımardanov

ÓSKEMEN. QazAqparat – D.Serikbaev atyndaǵy Shyǵys Qazaqstan tehnıkalyq ýnıversıtetiniń rektory, bıologııa ǵylymdarynyń doktory, professor Jasulan Shaımardanov Memleket basshysy Qasym-Jomart Toqaevtyń Úkimettiń keńeıtilgen otyrysynda atom energetıkasy jaıly jasaǵan málimdemesine qatysty pikir bildirdi, dep habarlaıdy QazAqparat tilshisi.

«Qasym-Jomart Toqaev óńirlik kóshbasshylyqty saqtaý úshin el ekonomıkasynyń quramdas bóligi retinde atom energetıkasynyń joǵary mańyzdylyǵyn atap ótti. Budan basqa, Ortalyq Azııanyń energııa júıesindegi taıaýdaǵy irkilister onyń jumys isteý senimdiligin arttyrý, al Ortalyq Azııa elderi úshin – energııamen qamtamasyz etýdi jaqsartý jáne energııa qaýipsizdigin nyǵaıtý qajettigin kórsetti. Sheshim jańa qýatty generatsııalaý kózderiniń paıda bolýymen ǵana baılanysty bolýy múmkin. Sonymen qatar Qazaqstan álemniń aldyńǵy qatarly elderi sııaqty taza energııa áleýetin arttyrýǵa baǵyttalǵan», - dedi ol.

Ǵalymnyń aıtýynsha, elimizdegi AES qurylysy boıynsha qoǵamda qyzý pikirtalas týǵan. Kópshilikti qaýipsizdik, ekologııa jáne daıarlanǵan personaldyń bolýy máseleleri tolǵandyrady.

«Birinshiden, qazirgi ýaqytta atom salasynda buryn Fýkýsıma, Chernobyl AES jáne basqa stantsııalardaǵy avarııalarmen baılanysty jaǵdaılardy joıý boıynsha biregeı tájirıbe jınaqtalǵan. Ekinshiden, álemde reaktorlardyń konstrýktıvtik jaǵynan ǵana emes, qýat spektri, jylý tasymaldaǵyshtar, ıadrolyq otyn boıynsha da erekshelenetin birqatar modelderi ázirlendi. Atom energetıkasynda sózsiz kóshbasshylar Reseı, Qytaı, Frantsııa. Úshinshiden, atom elektr stantsııalaryn salý qaýipsizdikti qamtamasyz etýdiń qatań normalaryn saqtaý maqsatynda Atom energetıkasy jónindegi halyqaralyq agenttik tarapynan qadaǵalanady. ıAdrolyq qaýipsizdik – bir eldiń mindeti emes, muny búkil álem túsinedi. Jalpy elimizge atom energetıkasyn damytý úshin ulttyq baǵdarlama qajet», - dedi Jasulan Shaımardanov.

Onyń sózinshe, atom energetıkasyn damytýǵa Qazaqstannyń áleýeti jetkilikti. Bul úshin barlyq qajetti resýrstar bar.