Atom energetıkasy salasyna kadr daıyndaý máselesi sheteldik JOO-men birlese sheshiledi

ASTANA. KAZINFORM – Atom energetıkasy agenttiginiń tóraǵasy Almasadam Sátqalıev Nazarbaev ýnıversıteti Joǵary bıznes mektebiniń dekany, professor Iozef Kenıngs jáne AQSh-tyń Dıýk ýnıversıtetiniń professory Devıd Robınsonmen kezdesý ótkizdi.

Kezdesý barysynda taraptar Qazaqstannyń atom salasy úshin kadrlar daıarlaý baǵytyndaǵy yntymaqtastyq perspektıvalaryn, sonyń ishinde birlesken bilim berý baǵdarlamalaryn qurý, akademııalyq almasý jáne sheteldik seriktesterdiń qatysýymen ǵylymı-zertteý salasyndaǵy ózara is-qımyldy talqylady.

Ásirese, elimizde atom elektr stantsııasyn salý jónindegi strategııalyq josparlardy iske asyrý jaǵdaıynda ulttyq kadrlyq áleýetti qalyptastyrý máselesine erekshe nazar aýdaryldy.

«Adam kapıtalyn damytý – Qazaqstanda ıadrolyq tehnologııalardy turaqty ári qaýipsiz engizýdiń ajyramas bóligi. Jetekshi akademııalyq ınstıtýttarmen yntymaqtastyq bolashaq atom elektr stantsııalaryn tıimdi ári qaýipsiz paıdalanýdy qamtamasyz ete alatyn jańa býyn mamandaryn qalyptastyrýǵa yqpal etedi dep senemin», – dedi Sátqalıev.

Aıta keteıik, Atomdyq qadaǵalaý jáne baqylaý komıtetiniń tóraǵasy aýysty.