Atom energetıkasy men jasandy ıntellekt termınderi qazaq tilinde júıelenedi
ASTANA. KAZINFORM - Atom energııasy jónindegi agenttikte Qazaqstan halqynyń tilderi kúni merekesine oraı qazaq til biliminiń negizin qalaýshy Ahmet Baıtursynulynyń ǵylymı murasy men qazirgi ǵylymdaǵy salalyq termınderdi júıeleý máselelerine arnalǵan «Ahmet taǵylymy jáne salalyq termınologııa» taqyrybynda dóńgelek ústel (oı-talqy) ótti.
Agenttiktiń baspasóz qyzmetiniń habarlaýynsha, jıyn barysynda jahandaný jaǵdaıynda Alash qaıratkeri Ahmet Baıtursynulynyń ulttyq termınologııany qalyptastyrýdaǵy ǵylymı-ádistemelik ustanymdarynyń búginde ózektiligin saqtap otyrǵany atap ótildi. Onyń termın jasaýdaǵy qaǵıdattary qazaq tiliniń kásibı jáne ǵylymı qoldanysyn damytý úshin mańyzdy negiz bolyp tabylady.
Sondaı-aq atom ónerkásibi, ıadrolyq ǵylym, qoldanbaly tehnologııalar, radıatsııalyq jáne ıadrolyq fızıkalyq qaýipsizdik salalaryndaǵy termınderdi halyqaralyq standarttarǵa jáne qazaq tiliniń tabıǵı zańdylyqtaryna sáıkes júıeleý men birizdendirý máseleleri talqylandy.
-Budan bólek, tsıfrlandyrý jáne jasandy ıntellekt tehnologııalary qarqyndy damyp jatqan kezeńde paıda bolyp jatqan jańa uǵymdardy qazaq tiline aýdarý, olardy termın retinde qalyptastyrý jáne kásibı ortada qoldanysqa engizý tájirıbesi ortaǵa salyndy,-delingen habarlamada.
Sondaı-aq onda jyn qorytyndysy boıynsha salalyq sózdikterdi jetildirý, termınologııalyq jumystardy úılestirý jáne memlekettik qyzmetshilerdiń osy baǵyttaǵy bastamalaryn qoldaý boıynsha birqatar usynystar ázirlendi.
Osyǵan deıin atom salasy úshin mamandar daıarlaýǵa baǵyttalǵan Salalyq keńes qurylǵany týraly jazdyq.
