Atom elektr stantsııasynyń ulttyq operatory uǵymy engiziledi
ASTANA.KAZINFORM – Parlament Májilisiniń jalpy otyrysynda «Radıoaktıvti qaldyqtarmen jumys isteý týraly» QR Zańy men ilespe qujattar qabyldandy.
Olar jóninde Májilis depýtaty, Ekologııa máseleleri jáne tabıǵat paıdalaný komıtetiniń múshesi Dúısenbaı Turǵanov baıandama jasap, ózgeristerdi málimdedi.
Zań radıoaktıvti qaldyqtarmen jumys isteý salasyndaǵy quqyqtyq negizder men qaǵıdattardy belgileýge, sondaı-aq qoldanystaǵy zańnamany negizgi zańnyń normalaryna sáıkestendirýge baǵyttalǵan.
– Usynylyp otyrǵan túzetýlerdiń eń mańyzdy nátıjesi radıoaktıvti qaldyqtardy saqtaý jáne kómý jónindegi jekelegen operatsııalardy retteýden radıoaktıvti qaldyqtarmen jumys isteýdiń búkil júıesin keshendi retteýge kóshý bolyp tabylady. Bul radıoaktıvti qaldyqtar obektilerin, olardyń ómirlik tsıklin, qaldyqtardy túzýshilerdiń mindetterin, ulttyq operatordyń rólin, qyzmettiń jalpy sharttaryn, memlekettik retteýdi, esepke alý men baqylaýdy, qaýipsizdikti, qarjylandyrýdy jáne ıadrolyq mura máselelerin qamtıdy, – dedi Dúısenbaı Turǵanov.
Іlespe zań jobasynda kelesi normalar qabyldandy:
• turaqty memlekettik baqylaý men qadaǵalaý rejımin engizý jáne ony júzege asyrý tártibin bekitý;
• «ıadrolyq mura obektileri» uǵymyn engizý;
• ýákiletti organnyń quzyretin naqtylaý;
• atom energııasyn paıdalaný obektileriniń ereksheligin, yqtımal qaýiptilik deńgeıin, qaýipsizdik talaptaryn jáne osy saladaǵy halyqaralyq tásilderdi eskere otyryp, memlekettik baqylaý men qadaǵalaýdyń arnaıy tártibin bekitý;
• «Atom elektr stantsııasynyń ulttyq operatory» uǵymyn engizý.
Atom elektr stantsııasynyń ulttyq operatory memleket júz paıyz qatysatyn, atom elektr stantsııasyn jobalaýdy, salýdy, paıdalanýdy jáne paıdalanýdan shyǵarýdy júzege asyratyn zańdy tulǵa bolady.
Sondaı-aq Bıýdjet kodeksine atom elektr stantsııasynyń ulttyq operatoryn bıýdjettik kredıttik jeli nysanynda bıýdjettik kredıtteýdiń erekshelikterin bekitýge baǵyttalǵan túzetýler engizildi.
Jer qoınaýy jáne jer qoınaýyn paıdalaný týraly kodeks boıynsha zań jobasyna kelesi normalar engizildi:
• Atom energııasy jónindegi agenttikti ýran salasyndaǵy ýákiletti organ retinde aıqyndaý jáne oǵan ýrandy barlaýdy retteý jónindegi ókilettikter berý;
• «Taý-Ken Samuryq» UTK» AQ-ny ýran men kómirden basqa strategııalyq resýrstardy barlaýǵa jáne óndirýge lıtsenzııalar alýǵa quqyly ulttyq kompanııa retinde aıqyndaý;
• barlaý kezeńinde toqsan kúnnen astam merzimge burǵylanǵan uńǵymany ýaqytsha paıdalaný tetigin engizý.
Sondaı-aq zań jobalarynyń tujyrymdamalyq baǵytyn ózgertpeıtin redaktsııalyq jáne zań tehnıkasyna qatysty naqtylaýlar engizildi.
Aıta keteıik, buǵan deıin Qazaqstan men Japonııa atom salasyndaǵy yntymaqtastyqty damytý máselesin talqylaǵanyn jazǵanbyz.
