Atmosferalyq aýa sapasyn baqylaý: El aýmaǵy 100 paıyz qamtylady
NUR-SULTAN. QazAqparat – Bıyl atmosferalyq aýa sapasyn baqylaý úshin 30 yqsham avtomatty stansa iske qosylady. Bul týraly Ekologııa, geologııa jáne tabıǵı resýrstar mınıstrliginiń keńeıtilgen alqa májilisinde osy vedomstvonyń vıtse-mınıstri Ahmetjan Pirimqulov málim etti, dep habarlaıdy QazAqparat tilshisi.
«Ózderińizge belgili, ekologııalyq problemalardy júıeli sheshý úshin bıyldyń basynda Memleket basshysy jańa redaktsııadaǵy Ekologııa kodeksine qol qoıdy. Bul mınıstrliktiń sońǵy eki jylda atqarǵan jumysynyń nátıjesi. Eldi tolǵandyratyn máselelerdiń biri – atmosferalyq aýanyń sapasy. Atmosferalyq aýany taldaý 2020 jyly 45 eldi mekende, 140 baqylaý beketinde júrgizildi. Bıyl atmosferalyq aýa sapasyn baqylaý úshin 30 yqsham avtomatty stansany alý josparda bar. Bul el aýmaǵyn 100 paıyz qamtýǵa jáne halyqty shynaıy aqparatpen qamtamasyz etýge múmkindik beredi», - dedi A. Pirimqulov.
Onyń aıtýynsha, jerústi sýlarynyń jaı-kúıine monıtorıng 143 sý nysanynda, sonyń arasynda 93 ózende, 31 kólde, 15 sý qoımasy, 3 arnada jáne bir teńizde júrgizildi. Syrdarııa, Eginsý, Qatta-Bógen ózenderiniń sý sapasynyń nasharlaýy baıqaldy.
