Atletter aýylyndaǵy jıhazdar men turmystyq tehnıkalar úlestirildi
ALMATY. QazAqparat - Atletter aýylyndaǵy barlyq jıhazdar men turmystyq tehnıka Almatynyń áleýmettik mekemelerine berildi, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
«Ýnıversıada murasy» jobasy aıasynda Atletter aýylyndaǵy 140 myńnan astam turmystyq zattar, orgtehnıka, arnaıy qondyrǵylar Almaty qalasynyń 500 áleýmettik mekemeleri arasynda bólindi.
«Sportshylar úshin alynǵan tósekter, tońazytqyshtar, kir jýatyn mashınalar, stoldar, útik taqtalary, televızorlar, medıtsınalyq qondyrǵylar,ofıstik tehnıka jáne taǵy basqa - barlyǵy 450-ge jýyq zattar qala aýrýhanalaryna, mektepterge, emhanalarǵa, bala baqshalarǵa, kolledjderge, sport mektepterine, jataqhanalarǵa, ardagerler úıine taratyldy», delingen habarlamada.
«Qala aýrýhanalarynda birqatar daıyndyq jumystary júrgizildi, materıaldyq-tehnıkalyq baza jaqsardy, qyzmetkerler aǵylshyn tili kýrsynan ótti. Bizge qondyrǵy, jıhaz, orgtehnıka berildi. Bulardyń barlyǵy kelgen adamdarǵa sapaly qyzmet kórsetýge kóp múmkindik beredi. Mysaly, ota jasalǵan syrqattardyń tez saýyǵýy úshin jaıly ortopedııalyq matratstar qashanda kerek»,- dedi Perınatologııa jáne balalar kardıohırýrgııasy ortalyǵy dırektorynyń orynbasary Gaýhar Kóshkimbaeva.
«Qala ákimshiligi Almatydaǵy oıyndardan soń sport nysandarynda qalǵan barlyq jańa jıhazdardy, tehnıkalardy, túrli qondyrǵylardy megapolıstiń áleýmetttik mekemelerine bólip berý týraly sheshim qabyldaǵan edi. Bul bizge úlken qoldaý, ásirese úılerinen jyraqta, jataqhanada turatyn balalar úshin yńǵaıly», - dedi Almaty memlekettik Energetıka jáne elektrondy tehnologııa kolledjiniń dırektory Tóleýǵalı Taıtúleev.
Ýnıversıada nysandaryn paıdalaný jáne ustaý jónindegi dırektor Sergeı Apenko barlyq tehnıkalardy, jıhazdar men qondyrǵylardy áleýmettik mekemelerge taratý týraly sheshimdi qala basshylyǵynyń Ýnıversıada qarsańynda qabyldaǵanyn aıtty.
«Qala ákimdigi áleýmettik mekemelerden qandaı tehnıka, jıhaz qajettigi jóninde ótinim alyp, arnaıy tizim jasaǵan bolatyn», -dedi S.Apenko.
Eske sala keteıik, Almatyda Ýnıversıada tarıhynda alǵash ret 5000 myń oryndyq Atletter aýyly salyndy. «Ýnıversıada murasy» aıasynda bul turǵyn kesheni úı kezeginde turǵandar arasynda bólinedi, sonyń arqasynda megapolıstegi úı kezegi 10%-ǵa azaımaq.
