«Atletıko Madrıd» Qazaqstandaǵy fýtbol akademııasynyń bolashaǵyn joǵary baǵalady
ASTANA. KAZINFORM — Memleket basshysy «Atletıko Madrıd» bas dırektory Mıgel Anhel Hıl Marındi qabyldady, dep habarlaıdy Aqordanyń baspasóz qyzmeti.
Prezıdent Qasym-Jomart Toqaev «Atletıko Madrıd» fýtbol klýbymen tabysty yntymaqtastyqty joǵary baǵalap, Mıgel Anhel Hıl Marınniń Qazaqstanǵa sapary seriktestikti jańa deńgeıge kóterýge múmkindik beretinin atap ótti.
Memleket basshysynyń aıtýynsha, Qazaqstan zamanaýı fýtbol ınfraqurylymyna, jattyǵý bazasyna jáne jas oıynshylardy daıarlaý baǵdarlamasyna belsendi túrde ınvestıtsııa quıyp jatyr. Sonymen qatar eldegi fýtbol klýbtaryn jekeshelendirý úderisi jalǵasýda.
Budan bólek, Prezıdent FIFA-men birge barlyq óńirde balalarǵa arnalǵan 100-den astam jańa fýtbol alańyn salý jumystary qolǵa alynǵanyna nazar aýdardy.
Áńgimelesý barysynda Qasym-Jomart Toqaev Ispanııa quramasy men ıspanııalyq fýtbol mektebiniń jetistikterine aıryqsha toqtalyp, osy ozyq tájirıbeni tereń zerdeleýge jáne ony qazaqstandyq daryndy oıynshylardyń jańa býynyn tárbıeleý isinde paıdalanýǵa múddeli ekenimizdi atap ótti.
«Atletıko Madrıd» klýbynyń bas dırektory elimizde fýtboldy qoldaýǵa erekshe nazar aýdarǵany úshin Prezıdentke rızashylyǵyn jetkizdi.
Ol Almaty oblysyndaǵy «Atletıko Madrıd» akademııasynyń ınfraqurylymy týraly oń pikir bildirip, onyń keleshekte fýtbolǵa arnalǵan úzdik oqý-jattyǵý keshenderiniń biri bolatynyn aıtty.
Buǵan deıin Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń otyrysy ótkizilgenin jazdyq.
