Atlantıkalyq tsıklonnyń áseri: elimizde aýa raıy taǵy qubylady
ASTANA. KAZINFORM — Elimizde keıingi kúnderi tabıǵat tosyn minez tanytyp jatyr. Sınoptıkter aldaǵy kúnderi de aýa raıynyń qubylmaly bolatynyn eskertti.
Tabıǵattaǵy mundaı qubylystardyń jıileýine ne sebep? Saýalǵa «Qazgıdromet» RMK Uzaq merzimdi aýa raıyn boljaý basqarmasynyń basshysy Juldyz Isabekova jaýap berdi.
Basqarma basshysynyń aıtýynsha, qolaısyz aýa raıy ázirge báseńdemeıdi. Aldaǵy kúnderi Shyǵys Qazaqstan, Abaı jáne Pavlodar oblystarynda qatty jańbyr, burshaq jaýyp, ekpindi jel turýy yqtımal. Maman muny Atlantıkalyq tsıklonnyń áserimen baılanystyrdy.
– Bul úrdis shilde aıynyń sońyna deıin jalǵasady. Jaqynda bolǵan Pavlodardaǵy jelge qatysty aıtar bolsaq, ol anomaldi qubylysqa jatpaıdy, – dedi ol Jibek Joly telearnasynyń «Búgin Live» baǵdarlamasynda.
Osyndaı jaǵdaıda turǵyndarǵa aldyn ala eskertý der kezinde jiberilip otyrady.
– Budan bólek, SMS habarlama qoljetimdi. Naızaǵaı qaýipti bolyp esepteledi. Turǵyndar osyny eskerýi qajet, – dedi maman.
Sınoptıkterdiń boljamynsha, aptap eldiń ońtústiginde tamyz aıynyń basynda da jalǵasýy múmkin. Al batys óńirlerde, kerisinshe, aýa temperatýrasy birtindep tómendeıdi.
– Eń ystyq aı – shilde. Tamyz aıynyń basynda da eldiń ońtústiginde, shyǵysynda ystyq saqtalady. Al batysta báseńdep, aýa temperatýrasy túsedi, – dedi spıker.
Aıta keteıik, jaqynda Japonııada aýa temperatýrasy 40°C-den asty.
