Atlant muhıtyndaǵy rekordtyq daýyl maýsymy aıaqtalýda
ASTANA. KAZINFORM – Dúnıejúzilik meteorologııalyq uıym (DMU) Atlantıkalyq daýyl maýsymy osy demalys kúnderi resmı túrde aıaqtalyp, Amerıka men Karıb teńizinde qıraý, ekonomıkalyq shyǵyn izin qaldyratynyn málimdedi, dep habarlaıdy Kazinform tilshisi BUU baspasóz qyzmetine silteme jasap.
Bıylǵy jyly 18 ataýly daýyl, 11 daýyl jáne 3 nemese odan joǵary sanattaǵy bes iri daýyl bolǵan. Bul Atlant basseıni úshin ortashadan joǵary kórsetkish, mundaı belsendilik qatarynan toǵyzynshy maýsym boıy qaıtalanýda.
– Jyldan jylǵa klımattyq daǵdarys jańa rekordtar jasaýdy jalǵastyrýda. Bul ekstremaldy aýa raıy oqıǵalarynyń, sonyń ishinde tropıkalyq tsıklondardyń tez kúsheıýine, qarqyndy jaýyn-shashyn men sý tasqynyna alyp keledi, – dedi DMU Bas hatshysy Selesta Saýlo.
Berıll daýyly Atlant muhıtynyń basseıninde tirkelgen eń alǵashqy 5-sanattaǵy daýyl retinde tarıhqa endi. Shildede ol Karıb teńizinde joıqyn kúshpen soqty. Berıll úıler men ınfraqurylymǵa aıtarlyqtaı zııan keltirgenimen, onyń adam ómirine tónetin qaýpi erte eskertý júıeleri arqyly biraz azaıtyldy.
Atmosferalyq jaǵdaılarǵa baılanysty tamyzda daýyldyń belsendiligi báseńdedi, biraq qyrkúıektiń basynda daýyldardyń jıiligi men qarqyndylyǵy qaıtadan artty. 25 qyrkúıekten beri jeti daýyl boldy, bul maýsymnyń sońǵy rekordy.
«Helen» daýyly Florıdanyń shyǵanaǵy jaǵalaýyna qyrkúıektiń aıaǵynda soǵyp, apatty sý tasqyny men shyǵyn ákeldi. Bul daýyl Amerıka Qurama Shtattarynda 2005 jyly Katrına daýylynan keıingi eń qaýiptisi boldy.
2024 jylǵy daýyl maýsymy klımattyq daǵdarystan týyndaǵan kúshti daýyldardyń alańdatarlyq úrdisin kórsetti.
Tropıkalyq tsıklondardan qaza bolǵandardyń ortasha sany 1970-shi jyldardaǵy 350 myńnan astam adamnan 2010 jyldardaǵy 20 myńǵa deıin tómendegenimen, ekonomıkalyq shyǵyndar ósti. Tek 2024 jyly Qurama Shtattardaǵy tórt daýyldyń árqaısysy 1 mıllıard dollardan astam shyǵyn ákeldi.
Eske salsaq, budan buryn Nıgerııada qaıyq aýdarylyp, 27 adam qaza tapqany belgili boldy.