Atqarýshylyq is júrgizýdi jetildirýge baǵyttalǵan qujat Májiliske qaıtaryldy - Senat
ASTANA. 19 jeltoqsan. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylady. Qujatqa birqatar ózgerister engizilgendikten, zań jobasy Májiliske jiberildi.
Eske sala keteıik, zań jobasynyń maqsaty atqarýshylyq is júrgizý salasyn retteıtin zańnamany jetildirý, sot oryndaýshylaryna boryshkerlerge áser etýdiń naqty tetikterin berý, sonymen birge sybaılas jemqorlyq kórinisterine yqpal etetin normalardy joıý bolyp tabylady. Budan bólek, qujatta usynylǵan ózgerister zańdy kúshine engen sot aktileriniń absolıýtti túrde oryndalýyna qol jetkizýdi qamtamasyz etýge baǵyttalady. Sonymen qatar, zań jobasy boıynsha sot oryndaýshylary jumysynyń tıimdiligin arttyrý maqsatynda olardyń ókilettiligin keńeıtý qarastyrylady.
Toqtala ketetin jaıt, búgingi kúni atqarýshylyq is júrgizý salasynda kúrdeli jaǵdaı qalyptasqan. Máselen, qoldanystaǵy ınstıtýttar men quraldar Konstıtýtsııanyń sot aktileriniń oryndalý mindetterin iske asyrylýyn qamtamasyz ete almaı keledi. Sondyqtan da, zań jobasy osyndaı olqylyqtardyń ornyn toltyrýǵa baǵyttalady.
Zań jobasyn talqylaý barysynda senatorlar Májilis maquldaǵan qujatqa birqatar túzetýler engizdi. Atap aıtqanda, Senat depýtattary kásipkerlik qyzmetti qorǵaý jáne bıznes ahýaldy jaqsartý maqsatynda birqatar usynys jasady.
