Atqarýshy organdardyń jumys kestesi memlekettik qyzmet standartyna saı ma
QOSTANAI. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamentiniń basshysy Salaýat Múksimov jýrnalıstermen kezdesip, óńirdegi memlekettik qyzmetti kórsetý sapasy jaıynda baıandady.
Jıynǵa «Azamattarǵa arnalǵan úkimet» memlekettik korporatsııasy Qostanaı oblysy boıynsha fılıalynyń dırektory Qanat Tólepuly da qatysty. Aldymen, agenttik basshysy Salaýat Syılybaıuly baıandama oqydy.
Onyń sózine súıensek, Qostanaı oblysy qyzmet kórsetý sapasy boıynsha respýblıkada úzdik úshtikke engen.
«Agenttiktiń basty mindeti - tutynýshynyń pikirin eskere otyryp, memlekettik qyzmet kórsetý sapasyn arttyrý. Osyǵan baılanysty kórsetiletin qyzmettiń sapasyn baǵalaý úshin «SANGE» qoǵamdyq monıtorıng zertteý ortalyǵymen birigip, áleýmettik zertteý júrgizdik. Zertteýge 60 memlekettik qyzmet irikteldi. 10 myń adamnan saýalnama alyndy. «Jasyryn satyp alýshy» ádisimen 25 zertteý júrgizildi jáne qyzmet alýshylardyń qatysýymen 60 toptyq pikirtalas ótti», - deıdi ol.
Zertteý nátıjelerine súıensek, respýblıka boıynsha memlekettik qyzmet kórsetý sapasyna qanaǵattanýshylyq 72,4%-dy qurady. Bul 2017 jylǵa qaraǵanda 6,7%-ǵa artyq.
Qoǵamdyq monıtorıng nátıjeleri boıynsha ortalyq jáne jergilikti atqarýshy organdardyń reıtıngi shyǵaryldy. Ortalyq memlekettik organdardyń arasynda Ulttyq bank pen Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi kósh bastap tur. Al jergilikti atqarýshy organdar arasynda Shyǵys Qazaqstan men Qostanaı jáne Soltústik Qazaqstan oblystary úzdik shyqqan.
Salaýat Múksimov aıtqandaı, qazirgi ýaqytta respondentter mekemelerdiń jumys kestesine narazy emes. Óıtkeni, departamenttiń usynysy negizinde jergilikti atqarýshy organdardyń jumys kestesi memlekettik qyzmet standarttarynyń talaptaryna sáıkes keltirilgen.
«Zertteý jumystary kórsetkendeı, jumys kestesine baılanysty másele joq. Alaıda, turǵyndardyń 10,2% memlekettik qyzmetkerlerdiń tildi meńgerý deńgeıine rıza emes. Departament olardyń talaptaryn ońtaılandyrý turǵysynan turaqty túrde taldaý júrgizip keledi. Bul olqylyqtyń ornyn toltyrýǵa bar kúshimizdi salamyz», - deıdi Salaýat Múksimov.
