Atqarýshylyq qujatty oryndamaǵan boryshkerge qandaı jaza qoldanylady
ASTANA. KAZINFORM — Sot aktileri men ózge de atqarýshylyq qujattardy oryndaý mindetti. Atqarýshylyq is júrgizýdiń qozǵalý faktisiniń ózi boryshkerge zańda jáne sot oryndaýshysy belgilegen merzimde atqarýshylyq qujat talaptaryn oryndaý mindetin júkteıdi.
Bul týraly «Aýmaqtyq ákimshilik tájirıbe bólimi» fılıalynyń aǵa sot oryndaýshysy Dáýren Onlasyn Astana qalasynyń kommýnıkatsııalar qyzmeti alańynda aıtty.
Onyń aıtýynsha, «Atqarýshylyq is júrgizý jáne sot oryndaýshylarynyń mártebesi týraly» zańnyń 125-babyna sáıkes, atqarýshylyq qujatty oryndamaǵan boryshker ákimshilik nemese qylmystyq jaýapkershilikke tartylýy múmkin.
— Bul rette jaýapkershilikke tartý boryshkerdi atqarýshylyq qujatty oryndaý mindetinen bosatpaıdy, ıaǵnı jaýapkershilik atqarýshylyq qujatty oryndaýdy almastyrmaıdy, kerisinshe boryshkerge yqpal etýdiń qosymsha sharasy sanalady, — dedi ol.
Onyń aıtýynsha, negizgi norma Qazaqstan Respýblıkasynyń Ákimshilik quqyq buzýshylyq týraly kodeksiniń 669-baby. Ol sot úkimin, sot sheshimin nemese ózge de sot aktisin, sondaı-aq atqarýshylyq qujatty oryndamaǵany úshin jaýapkershilikti kózdeıdi.
— Eger adamnyń áreketinde qylmystyq quqyq buzýshylyq belgileri bolmasa, sot aktisin nemese atqarýshylyq qujatty oryndamaý ákimshilik jaýapkershilikke ákep soǵady. Jeke tulǵalarǵa 5 AEK mólsherinde aıyppul salý, 20 saǵatqa deıin qoǵamdyq jumystarǵa tartý nemese 5 táýlikke deıin ákimshilik qamaqqa alý túrindegi jaza qarastyrylǵan, — dedi ol.
Sonymen qatar laýazymdy tulǵalarǵa — 20 AEK, shaǵyn kásipkerlik sýbektilerine nemese kommertsııalyq emes uıymdarǵa — 30 AEK, orta kásipkerlik sýbektilerine — 40 AEK, iri kásipkerlik sýbektilerine 50 AEK mólsherinde aıyppul kózdelgen.
Sonymen qatar atqarýshylyq qujatty uzaq ýaqyt boıy oryndamaý qylmystyq jaýapkershilikke de ákep soǵýy múmkin.
QR Qylmystyq kodeksiniń 430-babynyń 1-bóligine sáıkes, zańdy kúshine engen sot úkimin, sot sheshimin nemese ózge de sot aktisin ne atqarýshylyq qujatty alty aıdan astam oryndamaý, sondaı-aq olardyń oryndalýyna kedergi keltirý qylmystyq jaýapkershilikke jatady.
Mundaı áreket úshin 800 saǵatqa deıingi merzimge qoǵamdyq jumystarǵa tartý, úsh jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy qarastyrylǵan.
Sot oryndaýshynyń aıtýynsha, boryshkerge qoldanylatyn ákimshilik nemese qylmystyq sharalar negizgi mindetti atqarýshylyq qujatta kórsetilgen talaptardy oryndaýdy joımaıdy.
Aıta keteıik, osyǵan deıin Almatyda jeke sot oryndaýshysy zań buzǵany úshin lıtsenzııasynan aıyrylǵanyn jazdyq.
