Atqarý óndiristerin jetildirý baǵytynda ózgerister engizilmek
ASTANA. 20 qyrkúıek. QazAqparat - Qazirgi tańda elimizdegi keıbir zań qujattaryn zaman talabyna saı etý jumysy qolǵa alynyp otyr.
Osyǵan oraı, Zań jobasy sheńberinde Qylmystyq, Qylmystyq is júrgizý, Azamattyq is júrgizý, Ákimshilik quqyq buzýshylyq týraly kodeksterine, sondaı-aq, «Atqarýshylyq is júrgizý jáne sot oryndaýshylarynyń mártebesi týraly», «Qazaqstan Respýblıkasyndaǵy bankter jáne bank qyzmeti týraly», «Іshki ister organdary týraly», Zańdy tulǵalardy tirkeý týraly» Qazaqstan Respýblıkasynyń zańdaryna ózgerister engizilýde. Bul týraly Sot aktilerin oryndaý komıtetiniń baspasóz qyzmeti habarlaıdy.
Atalǵan zań jobasy Qazaqstan Respýblıkasynyń atqarý óndirisin jetildirý máseleleri jónindegi keıbir zańnamalyq aktilerindegi olqylyqtar men qaıshylyqtardy joıý, sonymen qatar, sot oryndaýshylary qyzmetiniń tıimdiligin arttyrý maqsatynda olardyń ókilettikterin keńeıtý máselelerine baǵyttalǵan.
Atap aıtqanda, zań jobasymen atqarý qujattaryna, jeke sot oryndaýshylarynyń qyzmet aqysyn tóleý mólsherlemesin tómendetý - regressıvti paıyzdyq tólem shkalasyn engizý jolymen qaıta qaraý, qaryzdaryn óteýden jaltarǵan boryshkerlerge sot aktisin oryndamaǵany úshin 0,1 paıyzy kóleminde ósimaqy qosylatyny, sot oryndaýshylar atqarý óndirisin oryndaý barysynda beınekameralar men fototúsirilimderdi paıdalanýy qarastyrylǵan.
Sonymen birge, zań jobasynda, boryshkerlerge zańdy tulǵalardy tirkeý, jyljıtyn jáne jyljymaıtyn múlikti tirkeý jáne t.b. sııaqty memlekettik qyzmetterdi kórsetýden bas tartý, boryshkerlerdiń sot sheshimin óz erkimen oryndaý ýaqyty alynyp tastalýy, jalpy alıment óndirisi ortasha jalaqy kóleminde óndiriletini sııaqty ózgertýler kózdelgen.
Zań jobasyna engizilgen tolyqtyrýlar men ózgerister sot oryndaýshylar jumysynyń ilgeri jyljýyna, damýyna óz septigin tıgizedi.
