Atysty toqtatý rejımi buzyldy, Izraıl Irandy qaıta atqylamaq
ASTANA. KAZINFORM - Tel-Avıv Tegerandy zymyran atty dep aıyptady, al Iran bul málimdemelerdi joqqa shyǵaryp otyr, dep habarlaıdy Kazinform agenttiginiń menshikti tilshisi.
Izraıl bıligi atysty toqtatý týraly kelisimniń buzylýyna baılanysty Iran nysandaryna soqqy berý týraly buıryq shyǵardy. Bul týraly seısenbi kúni tańerteń eldiń Qorǵanys mınıstrligi habarlady.
Izraıl Qorǵanys armııasynyń (TsAHAL) málimdemesine sáıkes, atysty toqtatý týraly ekijaqty kelisim kúshine engennen birneshe saǵat ótken soń Iran aýmaǵynan Izraılge keminde eki ballıstıkalyq zymyran ushyrylǵan.
Eki zymyrandy áýe qorǵanys júıesi joıǵan. Eshkim zardap shekpegen, qıraǵan ǵımarattar joq.
— Izraıldiń qorǵanys mınıstri Israel Kats Tegerannyń ortalyǵyndaǵy Iran rejıminiń nysandaryna joıqyn soqqy berýdi tapsyrdy, — delingen mınıstrlik taratqan resmı habarlamada.
TsAHAL Bas shtabynyń bastyǵy Eıal Zamır atysty toqtatý rejımi buzylǵan jaǵdaıda armııa áreketke kóshetinin rastady.
— Biz kúsh qoldanamyz, — dedi ol armııa basshylyǵymen ótken jedel keńeste. Keńestiń mazmunyn TsAHAL baspasóz qyzmeti jarııa etti.
Izraıldiń soltústiginde áýe dabyly iske qosyldy, bılik turǵyndarǵa arnaıy nusqaý kelmeıinshe, qaýipsiz jerde bolýǵa keńes berdi.
Sonymen qatar, Irannyń memlekettik aqparat quraldary — ISNA agenttigi men IRIB teleradıokorporatsııasy Izraılge zymyran jiberilgenin joqqa shyǵaryp, Tel-Avıvtiń aıyptaýlaryn «negizsiz» dep atady.
Eske salaıyq, osy oqıǵaǵa deıin bir táýlikten az ýaqyt buryn Izraıl AQSh usynǵan atysty toqtatý kelisimine resmı túrde keliskenin rastaǵan bolatyn. El bıligi «Qaısar Arystan» operatsııasy aıasynda ıadrolyq jáne zymyrandyq qaýipterdiń joıylǵanyn málimdegen edi.
Sonymen qatar, TsAHAL-dyń habarlaýynsha, atysty toqtatý rejımi kúshine enbeı turyp, seısenbi kúni tańerteń Iran aýmaǵynan Izraıl baǵytyna shamamen 20 ballıstıkalyq zymyran atylǵan.
Olardyń biri Beer-Sheva qalasyndaǵy turǵyn úıge túsip, tórt adam mert bolǵan.
Aıta keteıik, AQSh prezıdenti Donald Tramp Izraıl men Iran arasyndaǵy atystyń tolyq toqtaǵanyn jarııalaǵan bolatyn.
Al Iran Izraılmen atysty toqtatý rejımi kúshine engenin málimdedi.