Atysty toqtatý kelisimine qaramastan, Gazadaǵy shabýyldar jalǵasyp jatyr – BUU
ASTANA. KAZINFORM — BUU-nyń basyp alynǵan Palestına aýmaǵyndaǵy oqıǵalardy tergeý jónindegi táýelsiz halyqaralyq komıssııasy Izraıldiń Gaza sektorynda genotsıd belgileri bar áreketterdi, sondaı-aq Palestına aýmaqtarynda áskerı qylmystar men adamzatqa qarsy qylmystardy jalǵastyryp jatqanyn málimdedi. Bul týraly Anadolu agenttigi jazdy.
Jarııalanǵan baıandamaǵa sáıkes, atysty toqtatý týraly kelisim kúshine engenine qaramastan, Izraıl kúshteri komıssııa genotsıd dep baǵalaıtyn áreketterin jalǵastyryp otyr. Qujatta Palestınanyń beıbit turǵyndary ádeıi shabýyl nysanasyna aınalyp otyrǵany aıtylǵan.
Komıssııa sarapshylary Iordan ózeniniń batys jaǵalaýyndaǵy basyp alynǵan aýmaqtaǵy jaǵdaıǵa da erekshe nazar aýdardy. Olardyń baǵalaýynsha, 2023 jylǵy 7 qazannan keıin óńirdegi ahýal edáýir nasharlaǵan.
Baıandamada keltirilgen málimetterge sáıkes, 2008 jyldan 2023 jylǵy 6 qazanǵa deıin Iordan ózeniniń batys jaǵalaýynda áýe soqqylarynan alty palestınalyq qaza tapqan. Al 2023 jylǵy 7 qazannan 2026 jylǵy 30 qyrkúıekke deıin áýe shabýyldarynan qaza tapqandar sany 254 adamǵa jetken.
Sonymen qatar 2025 jyldyń qańtarynan beri Izraıldiń áskerı operatsııalary saldarynan 34 176 palestınalyq úıin tastap ketýge májbúr bolǵan. Baıandamada beıbit turǵyndarǵa júıeli túrde shabýyl jasaý, azaptaý, jynystyq zorlyq-zombylyq kórsetý jáne balalardy óltirý týraly da aıyptaýlar keltirilgen.
Komıssııa tóraǵasy Shrınıvasan Mýralıdhardyń aıtýynsha, palestınalyqtardy qasaqana óltirý jáne jaralaý, olardyń úılerin qıratý, sondaı-aq Izraıl tarapynyń jaýapkershilikti moıyndamaýy — Palestına halqyn óz jerinen yǵystyrýǵa baǵyttalǵan keń aýqymdy strategııanyń bir bóligi.
Ol sondaı-aq Izraıldiń Gaza sektoryndaǵy baqylaý aýmaǵyn keńeıtýi saldarynan Izraıl armııasy baqylaıtyn «sary syzyqqa» jaqyndaǵan nemese ony kesip ótken palestınalyqtar qaza taýyp, jaralanyp jatqanyn atap ótti.
Buǵan deıin BUU Iordan ózeniniń batys jaǵalaýyndaǵy Izraıl qonystarynyń keńeıýine jáne Gaza sektoryndaǵy áskerı operatsııalardyń jalǵasýyna alańdaýshylyq bildirgen edi. Uıymnyń málimetinshe, atysty toqtatý týraly kelisim kúshinde bolǵanyna qaramastan, óńirdegi jaǵdaı turaqsyz kúıde qalyp otyr.
