«Atys toqtamaıdy»: Izraıl bitimge kelý týraly usynysty qabyldamady

ASTANA.KAZINFORM - Izraıl sársenbi kúngi AQSh pen Eýropalyq Odaqtyń aýqymdy soǵystyń aldyn alý úshin atysty úsh aptaǵa toqtatyp, "Hezbollamen" bitimge kelý týraly usynysyn qabyldamady, dep jazady VVS.

Izraıl Premer-mınıstri Bınıamın Netanıahý Izraıl áskerine «tolyq kúshpen» soǵysýdy jalǵastyrýdy buıyrdy jáne keshegi atysty toqtatý týraly úndeýdi jaýapsyz qaldyrdy.

Sársenbi kúni 11 el men Eýropalyq odaq birlesken málimdeme jasap, Izraıl men «Hezbollany» úsh aptalyq bitim jarııalaýǵa jáne osy ýaqyt ishinde qaqtyǵysty beıbit jolmen sheshýge shaqyrdy.

Ótinishke AQSh, Frantsııa, Ulybrıtanııa, Germanııa, Italııa, Japonııa, Kanada, Aýstralııa, Saýd Arabııasy, Birikken Arab Ámirlikteri, Katar jáne Eýropa Odaǵy qol qoıdy.

Bul usynysqa Netanıahý keńsesi: «Atysty toqtatý týraly jańalyq shyndyqqa janaspaıdy. Bul premer-mınıstr tipti jaýap ta qaıyrmaıtyn amerıkalyq-frantsýzdyq usynys», -dep jaýap berdi.

«Premer-mınıstr Izraılge qarsy kúresti tolyq kúshpen jáne oǵan usynylǵan josparlarǵa sáıkes jalǵastyrýdy buıyrdy. Sonymen qatar, Gazadaǵy shaıqas barlyq soǵys maqsattaryna qol jetkizgenshe jalǵasady», — dedi Netanıahý keńsesi.

Izraıldiń Syrtqy ister mınıstri Israel Katts keıinirek «soltústikte atys toqtatylmaıdy» dep túsindirdi.

«Biz Hezbolla terrorıstik uıymyna qarsy kúresti jeńiske jetkenshe jáne Soltústik turǵyndary úılerine qaýipsiz oralǵanǵa deıin jalǵastyramyz», — dedi Katts H áleýmettik jelisinde jarııalaǵan málimdemesinde.

Lıvannyń Densaýlyq saqtaý mınıstrliginiń málimeti boıynsha, beısenbide Izraıldiń Lıvandaǵy áýe shabýyldarynan 26 adam qaza tapty, olardyń 19-y eldiń soltústik-shyǵys aımaǵynda júrgen sırııalyqtar.

Buǵan deıin Izraıl áskerı kúshteri Lıvannan el aýmaǵy arqyly 45-ke jýyq zymyran atylǵanyn habarlady.

Aıta keteıik, buǵan deıin AQSh pen onyń odaqtastary Izraıl men «Hezbolla» arasyndaǵy atysty 21 kúnge toqtatýǵa shaqyrǵan bolatyn.