Atyraý–Oral joly I tehnıkalyq sanatqa qashan aýystyrylady

ASTANA. KAZINFORM – Bıyl Atyraý – Oral jolynyń 364 shaqyrym ýchaskesinde ortasha jóndeý jumystary júrgiziledi. Bul týraly Májilis depýtattarynyń saýalyna Kólik mınıstriniń mindetin atqarýshy Maqsat Qalıaqparovtyń jaýabynda aıtylǵan.

– Barlyq iri ınfraqurylymdyq joba avtojol salasyn damytýdyń úsh jyldyq josparynda kózdelgen. Olardy iske asyrý 2026-2028 jyldary halyqaralyq qarjy uıymdary qarjysyn tarta otyryp, «tolyq aıaqtaýmen beriletin» qaǵıdaty boıynsha josparlanǵan. Jospar aıasynda Qyzylorda – Jezqazǵan, Qyzylorda – Aqtóbe, Beıneý – Sekseýil, Qaraǵandy – Jezqazǵan, Ortalyq – Batys baǵyttaryn qosa alǵanda, negizgi tranzıttik dálizderdi salý jáne rekonstrýktsııalaý jónindegi jobalardy iske asyrý, sondaı-aq Qyzylorda, Saryaǵash jáne Rýdnyı qalalarynyń aınalma joldaryn salý júzege asyrylady, - dedi ol.

Onyń atap ótýinshe, Atyraý – Oral jolyn I tehnıkalyq sanat parametrlerine aýystyrý máselesi qarjylandyrý kózderin aıqyndaı otyryp, tıisti tehnıkalyq-ekonomıkalyq negizdemeni ázirleýdi talap etedi jáne 2030 jyldan keıin avtojol salasyn damytý josparyn qalyptastyrý kezinde belgilengen tártippen qaralady.

– 2026 jyly jalpy uzyndyǵy 364 shaqyrym ýchaskede ortasha jóndeý jobalaryn iske asyrý josparlanǵan. Onyń ishinde: – Atyraý oblysy boıynsha – 184 shaqyrym (5-189 shaqyrym), boljamdy quny - 24 mlrd teńge; Batys Qazaqstan oblysy boıynsha - 180 shaqyrym (189-249 jáne 372-492 shaqyrym), boljamdy quny – 23 mlrd teńge. Ýchaskelerdiń bir bóligi boıynsha tehnıkalyq qujattama men konkýrstyq rásimder ázirlenip jatyr. Qarjylandyrý Qazaqstannyń damý bankiniń qarajaty esebinen qamtamasyz etildi, - dedi Maqsat Qalıaqparov.

Aıta keteıik, elimizde Jol qaýipsizdigi strategııasy ázirlenip jatyr.