Atyraýlyqtarǵa sý basý qaýpi bar jolmen júrý qaýipti ekeni eskertildi

ATYRAÝ. KAZINFORM – Atyraý oblysynyń turǵyndaryna Mahambet, Inder aýdandary baǵytyndaǵy jolmen júrý qaýipti ekeni eskertildi.

Atyraý oblystyq tótenshe jaǵdaılar departamentiniń málimetinshe, búgin 24 mamyrda aýa raıyna baılanysty eskertý jarııalanyp otyr.

«Atyraý oblysynyń ońtústik, shyǵysynda naızaǵaı kútiledi. Túnde jáne tańerteń oblystyń batysynda tuman bolady. Oblystyń soltústik-shyǵysynda, ońtústiginde, shyǵysynda ekpini sekýndyna 15-20 metr jel soǵady», -delingen aqparatta.

Aýa raıynyń nasharlaýyna baılanysty oblys turǵyndaryna alys jolǵa shyqpaý qajettigi eskertildi.

«Ásirese, tasqyn qaýpi kúsheıip turǵan Mahambet, Inder aýdandary baǵytyndaǵy trassalarmen jolǵa shyqpaǵan jón. Bul baǵyttaǵy joldarmen júrý qaýipti. Qazir Atyraý oblysynda tabıǵı sıpattaǵy tótenshe jaǵdaı rejımi saqtalyp otyr. Sý tasqynynyń qaýpine baılanysty keıbir baǵyttaǵy avtomobıl joldary ýaqytsha jabyldy», -dep málim etti oblystyq jedel shtabtan.

Eske sala ketelik, buǵan deıin Jaıyq sýy tasyp, Atyraý-Oral jolynyń 80-85-shaqyrym aralyǵy jabylýy múmkin ekenin jazǵan bolatynbyz.