Atyraýlyqtar sý tasqyny kezinde kómekke kelgen áskerıler men qutqarýshylardy shyǵaryp saldy
ATYRAÝ. KAZINFORM – Atyraý turǵyndary tasqynǵa qarsy turý is-sharalaryna atsalysqan áskerıler men qutqarýshylardy shyǵaryp saldy. Іs-sharaǵa Tótenshe jaǵdaılar mınıstri Shyńǵys Arynov pen Atyraý oblysynyń ákimi Serik Shápkenov qatysty.
Atyraý oblysy ákimi baspasóz qyzmetiniń málimetinshe, munaıly óńirdegi eldi mekenderdi tasqyn sýdan qorǵaý úshin Qorǵanys mınıstrliginiń 30212, 5571, 6655, 82796 áskerı bólimderiniń, Tótenshe jaǵdaılar mınıstrligine qarasty 52859 áskerı bóliminiń jáne Ulttyq ulannyń áskerıleri kómekke keldi. Mańǵystaý, Aqtóbe, Túrkistan, Almaty, Qyzylorda oblystyq, Shymkent qalalyq tótenshe jaǵdaılar departamentiniń qyzmetkerleri de bul kómekten shet qalmady. Áskerıler men qutqarýshyar eki aı boıy tasqynǵa qarsy kúreske jumyldy.
Іs-sharaǵa qatysýshylar Jylyoı aýdany Qulsary qalasynda qyzmettik mindetin atqarý kezinde qaza tapqan Atyraý qalalyq №1 mamandandyrylǵan órt sóndirý bóliminiń bólimshe komandıri, azamattyq qorǵaý serjanty Beıbarys Raqymdy bir mınýt únsizdikpen eske aldy.
«Elimizdiń ár óńirinen kelgen áskerıler, qutqarýshylar óńirdegi áriptesterimen, turǵyndarmen birge Jaıyqtyń jaǵalaýyn bekitýge judyryqtaı jumylyp, eńbek etti. Tasqyn sýdan zardap shekken Jylyoı aýdanynyń jurtyna járdem berip, Mııaly aýylyn aman alyp qalýǵa jáne kúni-túni zalaldyń zardabyn joıý úshin ter tókti. Biz ata-babamyzdan jalǵasyp kele jatqan qundylyǵymyz – birlik pen yntymaqtyń naǵyz úlgisin kórdik. Sonymen rýhtandyq, jigerlendik. Birligimizdiń Jańa Qazaqstannyń dińgegi bop qala bererine kóz jetkizdik. Shákárimshe aıtqanda, «Birlik pen talapty eńbekke salǵannyń» nátıjesinde asaý tolqyndy aýyzdyqtaı aldyq. Sizderge Atyraý jurtshylyǵynyń sheksiz rızashylyǵyn jetkizip, alǵysymdy bildiremin», - dedi Serik Shápkenov.
Áskerıler men qutqarýshylarǵa Tótenshe jaǵdaı mınıstriniń, Atyraý oblysy ákiminiń Alǵys haty tabystaldy.
Eske sala ketelik, budan buryn Atyraý oblysynda 45,7 myń adam 59,7 mlrd teńge nesıesin keıin tóleıtinin jazǵan edik.
