Atyraýlyqtar men týrısterge lotosty julmaý jóninde eskertý jasaldy
ATYRAÝ. KAZINFORM – Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy óńir turǵyndary men qonaqtaryn Qyzyl kitapqa engen lotos gúlin julmaı, tabıǵatty qorǵaý talaptaryn qatań saqtaýǵa shaqyrdy.
Lotos – memleket qorǵaýyndaǵy sırek kezdesetin ósimdik. Ony julýǵa, syndyrýǵa, zaqymdaýǵa nemese zańsyz jınaýǵa tyıym salynǵan.
Mamandardyń málimetinshe, Qazaqstan Respýblıkasy Qylmystyq kodeksiniń 339-babyna sáıkes sırek kezdesetin jáne joıylyp ketý qaýpi tóngen ósimdikterdi zańsyz joıý nemese búldirý qylmystyq jaýapkershilikke ákeledi. Zań talaptaryn buzǵandarǵa 13 mln teńgege jýyq kólemde aıyppul salynýy nemese zańda kózdelgen ózge de jaýapkershilik qoldanylýy múmkin.
Eske salaıyq, jýyqta Atyraý qalasyna qarasty Tasqala aýyly mańyndaǵy Peretaska ózeginiń boıynan Qazaqstannyń Qyzyl kitabyna engen lotostyń tabıǵı jaǵdaıda ósetin jańa aýmaǵy anyqtalǵan edi.
Gúldiń bul túri buǵan deıin óńirge qarasty Qurmanǵazy aýdanyndaǵy Qıǵash ózeni mańynda ǵana ósetin.
