Atyraýlyqtar Hıýaz Dospanovanyń áýejaıdaǵy eskertkishine gúl shoǵyn qoıdy
ATYRAÝ. KAZINFORM – Atyraýdaǵy halyqaralyq áýejaı Halyq qaharmany Hıýaz Dospanovanyń esimimen atalady. Áýejaı alańyna qazaqtan shyqqan tuńǵysh ushqysh qyzdyń eskertkishi qoıylǵan.
Búgin Atyraý jurtshylyǵy Jeńis kúni merekesi aıasynda dańqty ushqyshtyń rýhyna taǵzym etti. Eskertkishke gúl shoǵyn qoıdy.
– Jeńis kúni – kalendarlyq data ǵana emes, maıdangerler erligimen jazylǵan tarıh. «Qanatty qyz» atanǵan ushqysh Hıýaz Dospanova – qazaq qyzynyń ójettigin batyldyǵymen, janqııarlyǵymen dáleldegen batyr. Ol Otandy súıýdiń úlgisin kórsetti, -dedi oblys ákimi Serik Shápkenov.
Úkimet qaýlysymen 2020 jyly Halyq qaharmany Hıýaz Dospanovanyń esimi Atyraý halyqaralyq áýejaıyna berilgen edi. Ol 1922 jyly Atyraý oblysyndaǵy Qurmanǵazy aýdanynda ómirge kelgen.
1940 jyly Oraldaǵy №1 orta mektebin úzdik bitirgen. Osy qaladaǵy aeroklýbta ushqyshtyń alǵashqy álippesin meńgergen.
Ekinshi dúnıejúzilik soǵysta ushqysh, shtýrman-atqysh bolǵan. Soltústik Kavkaz, Kýban, Qyrym, Ýkraına, Belarýs, Polsha, Germanııa aspanyndaǵy shaıqastarǵa qatysqan. Maıdanda 300-den asa jaýyngerlik operatsııany oryndaǵan.
Eske sala ketelik, budan buryn Keńes Odaǵynyń Batyry ataǵyna 2 ret usynylǵandar arasynda 6 qazaq bolǵanyn jazǵan bolatynbyz.
