Atyraýlyq jigit Jalǵansaı aýylyndaǵy qulpynaı alqabyna qaıyqpen qatynap júr
ATYRAÝ. KAZINFORM – Atyraý qalasynda turatyn jigit Jalǵansaı aýylyndaǵy qulpynaı alqabyna qaıyqpen qatynap júr.
Atyraý oblysy jedel shtabynyń málimetine súıensek, Dáýlet Ǵarıfolla qulpynaı ósirý úshin Mahambet aýdanyndaǵy Jalǵansaı aýyly mańynan 50 gektar jer alǵan. Ózi Atyraý qalasynda turady.
«Bizge qulpynaı ósirý úshin bólingen alqap Jaıyq ózenine taıaý mańda ornalasqan edi. Bıyl bul ózenniń jaıylmasyna mol sý shyqty. Soǵan baılanysty 0,5 gektarǵa qulpynaı ektik. Biz kún saıyn sol alqaptan 2-3 ret qulpynaı jınaımyz. Atyraý qalasyna 60-100 keli qulpynaı ákelip júrmiz. Qazir qulpynaı alqaby sý ortasynda tur. Sol sebepten, biz qulpynaı alqabyna qaıyqpen qatynaýǵa májbúrmiz. Biraq, tasqyn sýdyń moldyǵy bizdiń isimizge kedergi keltirgen joq», - deıdi Dáýlet Ǵarıfolla.
Eske sala ketelik, budan buryn Atyraýdaǵy Saryózek kanaly mańynan 9 sharýa qojalyǵy qaýipsiz aýmaqqa kóshiriletinin habarlaǵan bolatynbyz.
Al, búgin Jaıyq ózeniniń sýy Atyraýda 6 metrge jetkenin jazǵan edik.
