Atyraýlyq jigit «tankpen» kóshedegi aram shópti shaýyp júr
ATYRAÝ. KAZINFORM – Atyraýlyq jigit «tankpen» kóshedegi aram shópti shaýyp júr. Bul tehnıka 15-20 adamnyń jumysyn atqarady.
Tehnıka áskerı tank úlgisinde jasalǵan. Atyraý qalasynyń turǵyny Baǵytjan Dosanovta Qytaıda shyǵaryllǵan tehnıkanyń ekeýi bar.
«Jeke kásippen aınalysyp júrmin. Bıyl Atyraý qalasynyń mańyndaǵy Keńózek jáne Alǵabas eldi mekenindegi kóshede ósken aram shópti shabý konkýrsyna qatysqan edim. Bul isti atqarý úshin birneshe adamdy jumysqa tarttym. Jumysshylar aramshópti «trımmer» apparatymen shapty. Aptap ystyqta aram shópti shabý ońaı emes. Oǵan turaqty isteıtin jumysshylardy tabý da qıyn. Osyndaı sebeppen, ınternetten shóp shabatyn tehnıkany izdestirdim. Sondaı eki tehnıkany Qytaıǵa baryp, satyp alyp keldim», - deıdi Baǵytjan Dosanov.
Onyń aıtýyna qaraǵanda, «tankte» 200 attyń kúshi bar. Al, salmaǵy – 400 keli.
«Bul tehnıkamen kez kelgen shópti shabýǵa bolady. Pýltpen basqarylady. Sol sebepten, 50-60 metr qashyqtan basqarý múmkindigi bar. Shynjyr tabandy tehnıka jol talǵamaıdy. Sý aıdyndarynyń jaǵasynan da, batpaqta jerden de shóp shabýǵa bolady. Barlyq protses pýltpen retteledi», - deıdi Baǵytjan Dosanov.
Bir ereksheligi, «tank» shabylǵan shópti ýatyp jiberedi. Al, jaıaý adamǵa arnalǵan joldyń qaryn kúreýge bolady.
«Shóp shapqanda, ne qar kúregende benzın qoldanamyz. Bir kósheden ekinshisine jetkizý úshin akkýmýlıatormen júredi. Aldaǵy jumys aýqymy kóbeıse, taǵy osyndaı tehnıka satyp ákelemin», - deıdi Baǵytjan Dosanov.
Eske sala ketelik, buǵan deıin Atyraýdyń mańynan dendrologııalyq park salýǵa 20 gektar jer telimi bólingenin habarlaǵan edik.
