Atyraýlyq jastarǵa Prezıdenttiń jańa kitaby tartý etildi
ASTANA. KAZINFORM — Atyraýda Qazaqstan Respýblıkasynyń Prezıdenti Qasym-Jomart Toqaevtyń «Ádiletti qoǵamǵa — shynshyl sóz» atty kitabynyń tanystyrylymy ótti. Jıynǵa Atyraý oblysy ákiminiń orynbasary Daryn Shamuratov qatysyp, basqosýǵa jetekshilik etti.
Jıynǵa zııaly qaýym ókilderi, memlekettik qyzmetshiler, tarıhshylar, fılosoftar, ádebıettanýshylar, professor-oqytýshylar men jastar qatysty. Kezdesýde jınaqtyń mazmuny talqylanyp, Memleket basshysynyń ár jyldary aıtqan oı-tujyrymdarynyń qazirgi qoǵamdyq úderistermen sabaqtastyǵy aıtyldy.
«Ádiletti qoǵamǵa — shynshyl sóz» jınaǵyna táýelsizdiktiń alǵashqy jyldarynan bergi baıandamalarda, maqalalarda, suhbattar men kitaptarda aıtylǵan oılar engizilgen. Eńbekte memlekettilikti nyǵaıtý, ádilettilik pen zań ústemdigi, bilim men ǵylym, ulttyq qundylyqtar, tarıhı sana, mádenıet, til men rýhanııat, sondaı-aq urpaq tárbıesi sekildi mańyzdy taqyryptar qamtylǵan.
Jıynda Atyraý oblystyq ardagerler keńesiniń tóraǵasy Murat Óteshov kitaptyń ereksheligi Prezıdenttiń ár jyldary aıtqan oılarynyń ózara sabaqtastyǵyn kórsetýinde ekenin atap ótti. Onyń aıtýynsha, eńbekte jastarǵa qatysty oılardyń qamtylýy da mańyzdy. Sebebi eldiń uzaq merzimdi damýy bilimdi, eńbekqor ári jaýapty jas býynǵa baılanysty.
Qazaqstan Jazýshylar odaǵynyń Atyraý oblystyq fılıalynyń tóraǵasy Álııa Dáýletbaeva jınaqtaǵy mádenıet pen ulttyq qundylyqtarǵa qatysty oılarǵa toqtaldy.
— Bul — adam sapasyn kóterýge, qoǵamdy saýyqtyrýǵa baǵyttalǵan jınaq. Memleket basshysy ulttyq mádenı kodty saqtaý máselesine erekshe mán beredi. Ulttyń bolmysyn aıqyndaıtyn til, ádebıet, tarıh, dástúr men mádenıet — qoǵamnyń rýhanı tiregi. Sondyqtan eldiń jańǵyrýy ulttyq qundylyqtardan ajyramaýy kerek. Mádenıeti joǵary, tarıhı sanasy qalyptasqan, ulttyq qundylyqtaryn baǵalaıtyn azamat qana qoǵamnyń sapaly damýyna úles qosa alady, — dedi Álııa Dáýletbaeva.
Ol ulttyq mádenı kodty saqtaý ótkendi ǵana dáripteý emes, ony zaman talabyna saı jańǵyrtyp, keıingi býynǵa jetkizý ekenin atap ótti. Osy turǵydan alǵanda, kitaptaǵy mádenıetke qatysty oılar jas urpaqtyń ulttyq sanasyn qalyptastyrý men rýhanı qundylyqtardy dáripteýde mańyzdy.
Basqosýda Atyraý oblystyq máslıhatynyń depýtaty, kásipker, qoǵam belsendisi Nurlan Qaırdenov jáne «Jastar rýhy» jastar qanaty Atyraý oblystyq fılıalynyń tóraǵasy Abylaı Qurmetuly da kitapta kóterilgen máseleler jóninde pikir bildirdi.
Jıyn sońynda oblystaǵy jastar resýrstyq ortalyqtarynyń basshylaryna Memleket basshysy Qasym-Jomart Toqaevtyń «Ádiletti qoǵamǵa — shynshyl sóz» jınaǵy tabystaldy.
