Atyraýlyq zańger kompanııadan 6,1 mln teńge jalaqysyn óteýdi talap etti

ATYRAÝ. KAZINFORM – Atyraýda «L» JShS jumysqa qabyldaǵan zańgerge 6,1 mln teńgeni tólemeı kelgen. Al zańger jumystan shyǵýǵa májbúr bolǵan. 

Kompanııa zańgeri J. jalaqy bereshegin óndirý úshin Atyraý qalalyq sotyna talap aryzben júgingen.

– Sotta talap qoıýshy J.-nyń jaýapker «L» jaýapkershiligi shekteýli seriktestiginen eńbekaqy boıynsha bereshekti óndirý týraly azamattyq is qaraldy. Talap qoıýshy «L» JShS-ǵa zańger retinde jumysqa qabyldanǵan. Eńbek shartyna sáıkes onyń laýazymdyq aılyq jalaqysy 300 myń teńgeni quraǵan. Alaıda uzaq ýaqyt boıy jalaqy tólenbegendikten, talap qoıýshy óz erkimen jumystan shyǵýǵa májbúr bolǵan, - dep habarlady qalalyq sottan.

Esep aıyrysý paraǵyna sáıkes, talap qoıýshy J.-ǵa jalaqy boıynsha bereshegi 6 mln 178 myń 988 teńge bolǵan. Talap qoıýshy sottan jumys istegen kúnderine tólenbegen jalaqyny óndirýdi suraǵan.

– Azamattyq isti qaraý barysynda taraptar daýdy medıatsııa tártibimen retteý týraly kelisimge keldi. Kelisimsharttary boıynsha jaýapker «L» JShS talap qoıýshy J.-ǵa 6 mln 178 myń 988 teńgeni kelisimde belgilengen merzimge deıin tóleýge mindettendi. Sot uıǵarymymen medıatsııalyq kelisim bekitilip, atalǵan isti júrgizý toqtatyldy, - dep málim etti Atyraý qalalyq sotynan.

Eske sala ketelik, budan buryn Pavlodarda 70 mln teńgeden astam qaryzy bar boryshker ustalǵany jazylǵan edi.