Atyraýlyq ustaz oqýshylarǵa ulttyq asyq oıyndaryn úıretip júr
ATYRAÝ. KAZINFORM — Atyraýlyq ustaz Elvıra Aqbatyrova oqýshylarǵa ulttyq asyq oıyndaryn úıretedi. Ózi 200-den astam asyq jınap, túrli túske boıaǵan.
Buryn onyń otbasy Qyzylqoǵa aýdanynda turǵan. Keıin Atyraý qalasyna kóship kelgen.
Qazir ol munaıly shahardaǵy Q.Sátpaev atyndaǵy № 19 mektep-gımnazııasynyń bastaýysh synybyna dáris beredi.
«Ózimizdiń balalarymyz úshin asyq jınaǵan edik. Balalar eseıdi. Endi asyqty ne isteý kerek? Asyqty oqýshylarǵa ulttyq oıyndardy úıretý úshin mektepke alyp keldim. Oqýshylarym alǵashqyda asyqqa tańyrqap qarady. Buryn kórmegenderi de bar eken. Asyqqa qyzyqqandary úıine alyp ketýge surady. Keıin oqýshylarym asyq jınaı bastady. Synyptaǵy uldarǵa asyq atý, al, qyzdarǵa bes asyq pen hantalapaı oıyndaryn úırettim. Birinshi synyp oqýshylaryna áripterdi asyqtan qurastyrdym. Asyqpen oıyn oınaý oqýshylardyń qol motorıkasyn damytýyǵa septigin tıgizedi», -deıdi Elvıra Aqbatyrova.
Onyń aıtýynsha, ata-enesi, ózge de týystary asyq jınaýǵa kómektesken. Asyqty qyna, sháı men jún boıaýymen boıaıdy.
«Asyq oıyndarynyń balanyń symbatty bolyp ósýine yqpaly bar. Óıtkeni, asyq oınaǵan bala ıilý, júrý, sekirý, saqa ıirý, kózdep tıgizý, laqtyrý men atý sekildi túrli qımyldy jasaıdy. Asyq oınaǵan bala mergen, kózi qyraǵy, qoly ıkemdi, qımyly shapshań bolady. Oılaý qabileti jaqsarady, tústerdi tez ajyratady. Ásirese, asyq oıyndaryn bastaýysh synyptarynda oqýshylardy sergitý úshin paıdalanamyn», -deıdi Elvıra Aqbatyrova.
Eske sala ketelik, budan buryn Qazaqstanda ótetin V Dúnıejúzilik kóshpendiler oıyndaryna 58 el qatysatynyn jazǵan bolatynbyz.