Atyraýlyq túlekterlerge oblys ákiminiń 148 bilim granty bólindi

ATYRAÝ. KAZINFORM – Bıyl túlekterge Atyraý oblysy ákiminiń 148 bilim granty bólindi. Oǵan memlekettik bilim grantyn almaǵan talapkerler qatysqan.

Atyraý oblystyq bilim basqarmasynyń baspasóz qyzmetinen málim etkendeı, ákimniń granty 2017 jyldan beri berilip keledi. Bilim granty jergilikti bıýdjet esebinen qarjylandyrylady.

«Oblys ákiminiń grantyn berýdiń ózindik tártibi bar. Birinshiden, bul memlekettik bilim grantyn ıelene almaǵan talapkerlerge arnalǵan. Ekinshiden, ákim grantyn alý úshin ótkiziletin konkýrsqa mektep jáne kolledj túlekteri qatysty. Úshinshiden, ákim granty kadr tapshylyǵyna baılanysty suranys negizinde bólinedi. Basty talap – mamyr-maýsym aılaryndaǵy Ulttyq biryńǵaı testileý qorytyndysymen erejege sáıkes qujattardy tapsyrý», - dep habarlady basqarmanyń baspasóz qyzmeti.

Basqarmanyń aqparatyna qaraǵanda, ákim grantymen oqyǵan stýdentter joǵary oqý ornyn bitirgennen keıin jaýapty mekemeniń bergen joldamasymen jumysqa ornalasa alady. Bıyl bilim grantyn bólý kezinde medıtsına, pedagogıka, aýyl sharýashylyǵy, veterınarııa, orman resýrstary jáne orman sharýashylyǵy, dintaný, týrızm baǵytyndaǵy mamandyqtar tańdaldy.

Máselen, pedagogıka, beıneleý óneri jáne kórkem eńbek, mýzykalyq bilim, veterınarııa, dene shynyqtyrý jáne sport, týrızm jáne servıs mamandyǵynyń grantyn ıelengender H.Dosmuhamedov atyndaǵy Atyraý ýnıversıtetinde joǵary oqıdy.

Ákim grantynyń basym bóligi medıtsına salasyna maman daıarlaýǵa bólingen. Endi atyraýlyq túlekter Astana, Almaty, Qaraǵandy jáne Aqtóbe qalalaryndaǵy medıtsına ýnıversıtetinde jalpy medıtsına mamandyǵynda bilim alady. Al, dintaný, teologııa mamandyǵy úshin berilgen grant ıeleri Nur-Múbarak Egıpet Islam mádenıeti ýnıversıtetiniń stýdenti atandy.

Eske sala ketelik, budan buryn Almatyda oqıtyn stýdentter úshin salqyndatqyshy joq vagondar bólingenin jazǵan edik.