Atyraýlyq sportshylar Ábıbanyń beldesýin «Munaıshy» stadıonynan tamashalady

ATYRAÝ. KAZINFORM – Atyraýdaǵy «Munaıshy» stadıonyna jınalǵan jas sportshylar dzıýdoshy Ábıba Ábýjaqynovanyń beldesýin led ekrannan tamashalady. 

Ábıbanyń Olımpıadadaǵy beldesýin atyraýlyqtar da asyǵa kútti. Ásirese, dzıýdo, boks sektsııasyna qatysatyn jas sportshylar álsin-álsin saǵattaryna qarap, álemdik dodada baq synap jatqan sportshyǵa stadıonda otyryp qoldaý kórsetti. 

Solardyń biri – Abdýrahım Qazyqov. Ol 6 jyldan beri dzıýdomen aınalysyp júr. Sport sheberligine kandıdattyq normasyn oryndaǵan. Abdýrahım – dzıýdoshy Ábıba Ábýjaqynovany Olımpıadaǵa daıyndaǵan jattyqtyrýshy Meıirjan Esmaǵambetovtiń uly. 

«Ábıba ápkemizdiń alǵashqy beldesýdegi jeńisine qýanyp turmyn. Onyń jeńisti joly jalǵasqanyn qalaımyn. Elimizdiń Ánuranyn shyrqatyp, elimizge jeńispen oralsa eken», - deıdi Abdýrahım Qazyqov. 

Al, Gaýhar Zardemniń boks úıirmesine barǵanyna 7 jyl bolǵan. Bolashaqta eldiń namysyn halyqaralyq dodalarda asqaqtatqysy keledi. 

«Ábıba ápkemizdiń beldesýin tamashalaýǵa keldik. Túpki maqsatymyz – qazaqstandyq sportshylarǵa qoldaý bildirý. Onyń Olımpıada chempıony bolýyna tilektespiz», - deıdi Gaýhar. 

Eske sala ketelik, buǵan deıin dzıýdoshy Ábıba Ábýjaqynova alǵashqy beldesýinde qarsylasynan basym túskeni jazǵan edik. Sondaı-aq ol ekinshi aınalymda da jeńiske jetti.