Atyraýlyq sheberdiń sheberhanasynda bir aıda 60 dombyra jasalady

Atyraý oblysynda byltyr 268 kásipkerge 369,7 mln teńgeniń granty berilgen. Grant alǵandardyń arasynda aýyldarda turatyn 118 adam bar, dep habarlaıdy Kazinform.

Kásip ıeleriniń qatarynda qazaqtyń ulttyq aspaby — dombyra jasaýdy otbasylyq kásipke aınaldyrǵan erli-zaıypty Nurlybek pen Farıza Bısembaevtar da bar.

Eri dombyra jasaýdy 2018 jyly bastaǵan. Al, zaıyby byltyr otbasylyq kásipti keńeıtý úshin 2021-2025 jyldarǵa arnalǵan kásipkerlikti damytý jónindegi ulttyq jobaǵa qatysyp, 1 mln 350 myń teńge grant alǵan.

«Alǵashqyda shaǵyn tapsyrystardy ǵana qabyldap júrdim. Aǵashtan túrli buıym jasaýdy ákemnen úırengen edim. Memleketten kórsetilgen qoldaýdyń nátıjesinde otbasylyq kásibimiz jandandy. Qazir otbasylyq sheberhanada aıyna 60-qa jýyq dombyra jasalady. Sheberhanamyzda 4 adam turaqty jumys isteıdi. Olarǵa qosa birneshe turǵyndy ýaqytsha jumyspen qamtyp otyrmyz», - deıdi Nurlybek Bısembaev.

Onyń aıtýynsha, qazir tapsyrys kóbeıgen. Kásip ıesi tapsyrystyń bárin merziminde jasap úlgerýge tyrysady.

«Dombyrany mýzykalyq mektepter kóp alady. Jeke turǵyndardan da tapsyrys túsedi. Qajetti materıal jaǵynan qıyndyq joq. Kásip ashamyn, tabys tabamyn degen adamǵa memleket úlken múmkindik berip otyr», - dedi Nurlybek Bısembaev.

Endi erli-zaıypty sheberler jumysqa qajetti jańa qurylǵylar alyp, kásibin keńeıte túsýdi maqsat etip otyr.

Eske sala ketelik, budan buryn Bıyl Atyraý oblysynda 35,7 myń adam jumyspen qamtylatynyn habarlaǵan bolatynbyz.