Atyraýlyq sheber balyq terisinen qobyz jasady
ATYRAÝ. KAZINFORM — Atyraýlyq qolóner sheberi Nursultan Qalıev ulttyq aspap jasaý ónerine jańashyldyq engizip, qobyzdyń shanaǵyn balyq terisinen jasap shyqty. Sheberdiń aıtýynsha, bul ıdeıa óńirdiń ereksheligin ulttyq ónermen ushtastyrý maqsatynda týǵan.
Kóp jyldyq tájirıbesi bar sheber balyq terisin óńdeýdiń kúrdeli protsess ekenin aıtady. Búginde ol qobyzdyń erekshe únin shyǵarý úshin tek jaıynnyń terisin emes, basqa balyqty da paıdalanyp kórmek.
— Terini tuzdap qoıdym. 10 shaqty kún keptirip, kúnniń, jeldiń astynda qalmaý kerek. Kópshilik balyq terisinen qalaı dybys shyǵady tańǵalyp jatady. Balyq terisi óte názik bolǵanymen, durys óńdelse, aspap jasaýǵa jaramdy. Ásirese jaıyn terisiniń qurylymy ózgeshe, qabyǵy bolmaǵandyqtan maldyń terisine uqsas. Juqa bolsa da berik keledi, — dedi Nursultan Qalıev.
Sheberdiń aıtýynsha, tabıǵı materıaldy aspapqa beıimdeý úlken tózim men uqyptylyqtytalap etedi. Ol árbir detaldy birneshe ret tájirıbeden ótkizip baryp qoldanady.
Erekshe tehnologııamen jasalǵan qobyz kásibı mýzykanttardyń da qyzyǵýshylyǵyn týdyrǵan. Qobyzshy Dınara Tilekqabylovanyń aıtýynsha, jańa aspaptyń úni erekshe qońyr boıaýǵa ıe.
— Bul qobyzdyń shanaǵy sıyr nemese túıe terisinen emes, balyqtan, naqtyraq aıtqanda jaıyn terisinen jasalǵan. Bundaı tájirıbe buryn-sońdy kóp kezdespegen. Dybysy qońyr, kúıge óte laıyq aspap», — dedi ol.
Mamandar mundaı jańashyldyq ulttyq aspap jasaý ónerinde sırek kezdesetin tájirıbe ekenin aıtady.
Nursultan Qalıev aldaǵy ýaqytta da dástúrli óner men zamanaýı izdenisti ushtastyryp, qazaq qolónerin jańa qyrynan damytýǵa nıetti ekenin jetkizdi.
Buǵan deıin atyraýlyq kásipker demalys kesheninde afrıkalyq túıequstardy ósiretinin jazǵan edik.
