Atyraýlyq saıahatshy álemdegi eń sýyq jerge saparlady
ATYRAÝ. KAZINFORM — Atyraý qalasynyń turǵyny Berik Esenǵalıev adamdar turatyn álemdegi eń sýyq jer sanalatyn Oımıakon eldimekenine bardy. Ol qazir sol aýmaqta qysta barǵan alǵashqy qazaqstandyq saıahatshy retinde saparlap júr.
Qańtardyń ortasynda Berik Esenǵalıev jer sharyndaǵy sýyq ári qupııaǵa toly óńirlerdiń biri ıAkýtııaǵa jol tartty. Onyń sapardaǵy basty maqsaty — soltústik jartyshardyń «Sýyq polıýsi» atanǵan Oımıakon aýylyn kórý. Oımıakon — jer betindegi eń sýyq meken. ıAkýtııanyń bul aımaǵynda qańtar aıynda temperatýra -50 gradýsty kórsetip, keıde bul temperatýra bir aptaǵa sozylady. Oımıakon tarıhyndaǵy eń tómengi temperatýra -71,2 gradýsty quraǵan. Sýyqqa tózimdi ıakýt halqy bul aıazǵa ábden úırengen.
Saıahatshynyń aıtýynsha, ol uzaq ýaqyt boıy ańyzǵa aınalǵan Sýyq polıýsin óz kózimen kórýdi, sol óńirdegi qatal turmys jaǵdaıyn sezinip, saha halqynyń mádenıetimen jaqyn tanysýdy armandaǵan.
— Bul sapar men úshin jaı ǵana saıahat emes, ózimdi synaýǵa, tózimdilikti tekserýge jáne ózge halyqtyń ómir saltyn tereńirek tanýǵa múmkindik beredi, — dedi Berik Esenǵalıev.
ıAkýtııaǵa jetý joly ońaı bolmaǵan. Berik ádeıi qurlyq arqyly saparlaýdy tańdaǵan. 11 qańtarda Atyraý qalasynan shyǵyp, ıAkýtsk qalasyna 21 qańtarda jetken. Astanaǵa 1 kúndi aıaldaǵan ýaqytty qospaǵanda, jolǵa 9 kún ýaqyt ketken. Naqtyraq aıtqanda, saıahatshy bloger Atyraý — Astana — Petropavl — Novosibir — Tynda — Nıjnıı Bestıah baǵytymen poıyzben júrip, ıAkýtskige kólikpen jetken. 4 ýaqyt beldeýinen ótý men uzaq jol uıqy rejımine áser etkenimen, saıahatshyny maqsatyna jetýden taıdyrmaǵan.
Saıahatshy eń sýyq eldi mekende soltústik shuǵylany kórgen. Sondaı-aq Lena ózeniniń jaǵasyndaǵy jartasqa, ıaǵnı 2800 metr bıiktikte Qazaqstannyń týyn ildi. Sol sátti jáne saparynda kezdesken túrli adammen suhbatyn, jergilikti halyqtyń turmys-tirshiligin taspalap, áleýmettik jelidegi paraqshasyna jarııalap otyr.
— Kóktemde Nepalǵa saparǵa shyqqym keledi. Ol jaqtan «jabaıy» nemese «gallıýtsınogendi bal», aǵylshynsha mad honey dep atalatyn baldy jınaýdy josparlap otyrmyn, — dedi Berik Esenǵalıev.
Atyraýlyq azamat sapar barysynda kezdesken azamattarǵa Qazaqstan týraly qyzyqty málimet aıtyp, eldiń batysyndaǵy áser jerlerdi kórýge shaqyryp, elge týrıster tartyp jatyr.
Osyǵan deıin Qazaqstanǵa sheteldik saıahatshylardyń qyzyǵýshylyǵy 3 ese artqany jóninde jazǵan edik.