Atyraýlyq polıtseıler drondardyń kómegimen qoǵamdyq baqylaýdy kúsheıtti
ASTANA. KAZINFORM — Atyraý oblysynda jyl basynan beri qaraýsyz mal kesirinen 33 jol-kólik oqıǵasy tirkelgen. Onyń ishinde 3 adam qaza taýyp, 57 azamat túrli dene jaraqatyn aldy. Oblystyq polıtsııa departamentiniń qyzmetkerleri jol-kólik oqıǵalarynyń aldyn alý maqsatynda túsindirme jumystaryn júrgizýdi bastady. Bul týraly QR ІІM habarlady.
Basty maqsat — azamattarǵa qaýipsizdik sharalaryn esten shyǵarmaý kerektigin túsindirý jáne óz ómirin qorǵaýǵa baǵyttalǵan qarapaıym erejelerdi saqtaýdyń mańyzyn jetkizý.
Іs-shara barysynda patrýldik polıtsııa rotasynyń qyzmetkerleri qaraýsyz júrgen maldy anyqtaý úshin dron paıdalanyp, tasjol boıyndaǵy baqylaýdy kúsheıtip jatyr.
Polıtseılerdiń aıtýynsha, bul ádis maldy naqty qadaǵalap, jol ústindegi qaýiptiń aldyn alýǵa múmkindik beredi. Apattardyń aldyn alý úshin búginde polıtsııa qyzmetkerleri jasyryn patrýldeý, dron arqyly áýeden baqylaý, jyldamdyq ólsheý qurylǵylaryn paıdalaný, sondaı-aq júk kólikteri men avtobýstardy nysanaly tekserý sııaqty keshendi sharalardy qolǵa aldy.
Bul jumystardyń negizgi maqsaty — joldaǵy tártipti kúsheıtip, júrgizýshilerdiń de, jaıaý júrginshilerdiń de qaýipsizdigin qamtamasyz etý.
— Óńirde jol qozǵalysy qaýipsizdigin saqtaý maqsatynda jol saqshylary táýlik boıy qyzmet atqaryp, júrgizýshiler arasynda túsindirý jumystaryn úzdiksiz júrgizip keledi. Soǵan qaramastan, júrgizýshiler tarapynan jol erejelerin óreskel buzý derekteri áli de kezdesýde. Ásirese jyldamdyqty arttyrý, qarsy baǵytqa shyǵý, basyp ozý erejesin saqtamaý jáne maldy baǵýsyz jiberý — jol-kólik oqıǵalaryna tikeleı áser etetin negizgi faktorlardyń biri. Bıyl drondardy paıdalaný arqyly birneshe qaraýsyz júrgen mal anyqtaldy. Bul baǵyttaǵy baqylaý jumystary odan ári kúsheıtiledi, — dedi Atyraý oblysy polıtsııa departamenti bastyǵynyń orynbasary Ábdiǵanı Seıdýalıev.
Aıta keteıik, jyl basynan beri qaraýsyz mal kesirinen 33 jol-kólik oqıǵasy tirkelip, 3 adam qaza taýyp, 57 azamat túrli dene jaraqatyn alǵan. Sondyqtan tártip saqshylary turǵyndardan jol erejesin buzbaýǵa, maldy qaraýsyz qaldyrmaýǵa jáne joldaǵy qaýipsizdikti saqtaý máselesine barynsha jaýapkershilikpen qaraýyn suraıdy.
Aıta keteıik, Atyraýda qujaty joq 10 jasar bala polıtsııa kómegimen mektepke qabyldandy.