Atyraýlyq órender múgedekterdi ońaltýǵa arnalǵan qurylǵy oılap tapty
ATYRAÝ. KAZINFORM – Atyraýda kolledj stýdenti men lıtseı oqýshysy múmkindigi shekteýli jandardy ońaltýǵa arnalǵan qurylǵy jasap shyǵardy.
Ónertapqysh órenniń biri – APEC Petrotechnic joǵary kolledjiniń stýdenti Dámelıa Jalǵas. Al Ámına Talǵat J.Dosmuhambetov atyndaǵy lıtseıde oqıdy.
Ekeýi de «JasUp» jobasy aıasynda densaýlyq saqtaý salasyndaǵy ınnovatsııalyq jobalardy ázirleýmen aınalysyp júr. Olar múmkindigi shekteýli jandarǵa arnalǵan ońaltý qurylǵysynyń kontseptsııasyn oılap tapqan.
– Múmkindigi shekteýli jandarǵa kómektesý úshin medıtsına mamandarynan keńes aldyq. Óıtkeni elimizde tirek-qozǵalys apparatyna táýeldi jandardy ońaltýǵa arnalǵan qural-jabdyqtar jetispeıdi. Bul jobany eki aıda júzege asyrdyq. Ońaltýǵa arnaǵan qurylǵyǵa plastmassa, bekitkish, topsa jáne jeńil metall tútikterin qoldandyq, - deıdi Damelıa Jalǵas.
Olardyń jobasyna Atyraý oblysyndaǵy ońaltý ortalyqtary qyzyǵýshylyq tanytty. Qos qurby mundaı ortalyqtarmen birge osyndaı jobalardy iske asyrýdy kózdep otyr.
«JasUp» jobasynyń jetekshisi Asqar Aldannyń málimetinshe, byltyr 44 sheberlik saǵaty men 8 baıqaý uıymdastyrylǵan. Oǵan 13-25 jas aralyǵyndaǵy 3 myńnan astam jas qatysqan.
– Bul jobanyń maqsaty – jastardyń bos ýaqytyn paıdaly iske arnaýyna, tehnıkalyq daǵdysyn jetildirýine yqpal etý. Oǵan ustazdar da qatysyp, biliktiligin arttyrdy. Joba aıasynda robotehnıka, baǵdarlama daıyndaý, jasandy ıntellekt, 3D modeldeý jáne model jasaý boıynsha tegin sabaqtar ótkizildi, - dep málim etti Asqar Aldan.
Eske sala ketelik, buǵan deıin SQO-da 7-synyp oqýshysy golografııalyq sózdik oılap tapqany jazylǵan edi.