Atyraýlyq oqýshy Grekııada ótken án festıvaliniń bas júlde aldy

ATYRAÝ. KAZINFORM – Atyraýlyq oqýshy Dılnaz Ejirova Grekııada ótken án festıvaliniń bas júldesin ıelendi. Ol ándi aǵylshynsha oryndaǵan. 

Atyraý oblystyq bilim basqarmasy baspasóz qyzmetiniń aqparatyna súıensek, jas ónerpaz Grekııada «Greece Hope» halyqaralyq festıvalinde baq synaǵan.

«Bul festıvalge álemniń 19 elinen jas ónerpazdar qatysty. Atyraýdaǵy N.Tilendıev atyndaǵy mamandandyrylǵan mektep-gımnazııa-ınternatynyń oqýshysy Dılnaz Ejirova aǵylshyn tilindegi «Love Story» ánin oryndady. Qazylar alqasy qazaqstandyq oqýshynyń erekshe daýysy men sahnada ózin ustaý mádenıetine tánti bolyp, bas júldege laıyq dep tapty», - dep habarlady basqarmanyń baspasóz qyzmeti.

Ustazy Alma Nurashevanyń aıtýynsha, 13 jasar ánshi Dılnaz Ejirova buǵan deıin birneshe ret respýblıkalyq jáne halyqaralyq baıqaýlarda óner kórsetken. Ol – vokal janrynda úzdik nátıje kórsetip júrgen talantty shákirt.

«Dılnazdyń bul jeńisi – shyǵarmashylyǵyndaǵy jańa jetistigi. Muny elimizdiń óner salasyna qosylǵan zor úles deýge bolady. Álemdik óner saıysynda elimizdiń atyn asqaqtatqan jas ánshi bolashaqta jańa jetistikterge jetýge talpynady. Óıtkeni, ol – jas bolsa da talanty shyńdalyp kele jatqan ónerpaz», - deıdi Alma Nurasheva.

Eske sala ketelik, buǵan deıin Atyraýda mekteptiń 11-synyp oqýshysy referendýmda alǵash ret daýys bergenin habarlaǵan bolatynbyz.