Atyraýlyq kásipker oblys ákimin mektep ashanasyna qonaqqa shaqyrdy
ATYRAÝ. KAZINFORM – Atyraý qalasyndaǵy mektepterdiń oqýshylaryn ystyq tamaqpen qamtyp otyrǵan kásipkerler ár oqýshy úshin bólinetin aqshany 1 myń teńgege jetkizýdi suraıdy. Mundaı usynys oblys ákimi Serik Shápkenovtiń óńir kásipkerlerimen kezdesýinde aıtyldy.
Jeke kásipker Roza Kýbashevanyń sózinshe, qazirgi ýaqytta óńirde ár balany ystyq tamaqpen qamtý úshin 720 teńge bólinedi. Bul baǵaǵa ashanany jaldaý quny, qyzmetkerlerdiń aılyǵy, qajetti azyq-túlik kiredi.
– Nege bala tamaq jemeıdi? Basqarmanyń da, qalalyq bilim bóliminiń tarapynan da tekseris bolady. Olar da, mektep muǵalimderi de balalardyń tamaqty ne sebepti jemeıtinin túsinbeıdi. Tamaqty berý tásilin tolyqtaı ózgertý kerek dep oılaımyn. Japonııa men Ońtústik Koreıadaǵy mektepterde tamaq qalaı beriletinin kórip júrmiz. Kóz súısinedi. Al bizder 720 teńgege kún saıyn balalarǵa jemis pen kókónis bere almaımyz. Eger bizdiń usynysymyzdy qabyl alap, bir balanyń tamaǵyna bólinetin qarjyny 1 myń teńgege kóterseńiz tamaqty tábetti ashatyndaı usynyp, kún saıyn balǵyn jemis pen kókónis berýge daıynbyz, - dedi kásipker Roza Kýbasheva.
Atyraý oblystyq bilim berý basqarmasynyń resmı aqparatyna súıensek, 2023-2024 oqý jylynda bir balaǵa beriletin ystyq tamaq 535 teńgeni quraǵan. Al 2024-2025 oqý jylynda bul qarjy kólemi óspegen. 2025 jyldyń qyrkúıeginen bastap as máziriniń ortasha quny 584 teńgeden 798 teńge deıin ulǵaıtylǵan. Qazirgi ýaqytta oblys boıynsha 65 myńǵa jýyq oqýshy ystyq tamaqpen qamtylǵan. 4 myńnan asa balaǵa vaýcher berý jumysy júrip jatyr.
– Biz qazir ystyq tamaq retinde 120-130 gr garnır, 80 gr kotlet beremiz. Birinshi sabaqtan keıin bala ashanǵa júgirip keledi. Bul ýaqytta bizdiń bergen ystyq tamaqty kim jeıdi? Osy protses kúni boıy jalǵasady. Tamaqtyń quramyn ózgertpeımiz. Tek quramyndaǵy tamaqtardyń mólsherin azaıtyp, tábetti ashatyndaı etip usynamyz. Sizdi osy aqpan aıyndaǵy qaladaǵy mektepterdiń birine kelip, balalarǵa beriletin tamaqtan dám tatýǵa shaqyramyn, - dedi kásipker Roza Kýbasheva.
Bıznes ókili oblys ákimi Serik Shápkenovti qaladaǵy mektepterdiń birine oqýshylarmen birge tamaqtanýǵa shaqyryp, usynystaryn qaraýdy usyndy. Aımaq basshysy óz kezeginde bul taqyrypty basqarmamen talqylap, bir sheshim qabyldaıtynyn jetkizdi.
Aıta keteıik, qazirgi ýaqytta óńirdegi bilim oshaqtaryn ystyq tamaqpen qamtý jumysyna 30 kásipker jaýapty.
Osyǵan deıin Býrabaıda mektep dırektory ashanadaǵy tekseristen keıin qyzmetinen bosatylǵanyn jazǵan edik.