Atyraýlyq kásipker demalys kesheninde afrıkalyq túıequstardy ósiredi
ATYRAÝ. KAZINFORM — Atyraý qalasy mańyndaǵy demalys oryndarynyń birinde afrıkalyq túıequstar baptalyp jatyr. Óńirdiń aýa raıyna tez beıimdelgen ekzotıkalyq qustar búginde týrısterdiń erekshe qyzyǵýshylyǵyn týdyrady.
Keshen aýmaǵyndaǵy túıequstar qara sýyq pen aptap ystyqqa tózimdi. Mamandardyń aıtýynsha, olar erekshe kútimdi kóp qajet etpeıdi. Qazir demalys ornyna kelgen qonaqtar eń aldymen osy alyp qustardy kórýge asyǵady. Munda tek atyraýlyqtar ǵana emes, ózge óńirlerden arnaıy týrıster keledi.
Keshen ókili Dáýren Imanbaıdyń aıtýynsha, túıequstar Shymkentten aldyrylǵan.
— Erkeginiń jasy 5-te. Al urǵashylary 4 jasta. Jalpy sany — 3. Shymkent qalasyndaǵy fabrıkadan kishkentaı balapan kezinde aldyrdyq. Bes jyl bolyp qaldy. Ereksheligi — saǵatyna 70 shaqyrymǵa deıin júgire alady. Tepken kezdegi kúshi attyń tepkenimen shamalas deýge bolady, — dedi ol.
Іri denesine qaramastan túıequstar adamdarǵa tez úırengen. Ásirese balalarǵa erekshe qyzyǵýshylyq tanytyp, kelýshilerge jıi jaqyndaıdy eken.
Demalys kesheninde afrıkalyq túıequstardan bólek, ózge de erekshe janýarlar bar. Kelýshilerdiń nazaryn appaq qaýyrsyny bar albınos pavlınder men ıtterdiń arasynda ósip jatqan 6 aılyq qasqyr aýdaryp otyr.
Keshen ıeleri aldaǵy ýaqytta týrıster qyzyǵýshylyǵyn arttyrý úshin taǵy da erekshe janýarlardy ákelýdi josparlap otyr.
Buǵan deıin qustardy baqylaý zýmerlerdiń jańa hobbıine aınalǵanyn jazǵan edik.
